Արտահերթ ընտրությունների չի պատրաստվում, իսկ Մոսկվա, այո, գնալու եմ. ՀՀ վարչապետ

«Մենք չենք պատրաստվում արտահերթ ընտրություններին»։ Այս մասին Ազգային ժողովում Կառավարության հետ հարցուպատասխանի ընթացքում հայտարարեց ՀՀ վարչապետ Նիկոլ Փաշինյանը։

«Ես միշտ եղել եմ այն համոզմանը, որ ինչ-որ պետք է նկատի ՀՀ քաղաքացին, կնկատի: Այստեղ պետք է ավելի շատ մեր անելիքների մասին խոսենք, իսկ ես իմ անելիքը տեսնում եմ՝ ՀՀ քաղաքացիների հետ շփումները հնարավորինս ուղիղ ունենալով, ընդ որում՝ դա երբեք չի ընդհատվել։

Եթե հետահայաց նայենք վերջին տարիներին, ապա կտեսնենք, որ ամեն տարի կան պնդումներ, որ Կառավարությունը և քաղաքական մեծամասնությունը պատրաստվում են արտահերթ խորհրդարանական ընտրությունների: Դա պայմանավորված է նրանով, որ ես և մեր մյուս գործընկերները ակտիվ մարզային հանդիպումներ ենք ունենում, ուղիղ շփումներ, իսկ արդեն ծանոթ ձեռագիրն այն է, որ եթե պաշտոնյան մոտ տարածությունից քաղաքացի է տեսնում, ուղիղ «ապացույցն» է նրա, որ Կառավարությունը պատրաստվում է արտահերթ ընտրությունների»,- պարզաբանեց վարչապետը։

Նիկոլ Փաշինյանը մայիսի 9-ին կմասնակցի Մոսկվայում կայանալիք Հաղթանակի շքերթին․ «Այո՛, այո՛, գնալու եմ»,- ասել է նա՝ պատասխանելով համապատասխան հարցին։

Հիշեցնենք՝ ՀՀ վարչապետ Նիկոլ Փաշինյանը մարտի 14-ին ՌԴ նախագահ Վլադիմիր Պուտինի հետ կայացած հեռախոսազրույցի ընթացքում ևս հաստատել էր, որ ընդունում է Ռուսաստանի նախագահի հրավերը և մասնակցելու է մայիսի 9-ին Մոսկվայում կայանալիք տոնակատարություններին։