04/06/2025

Արդյոք նորմալ է, որ ԱԺ փոխխոսնակը հրապարակային կերպով վիրավորում է մարդու ողջ տոհմը. Ռուստամյան

«Հայաստան» խմբակցության պատգամավոր Արմեն Ռուստամյանը  քննադատել է Ազգային ժողովում տեղի ունեցած միջադեպը՝ այն անվանելով «այլանդակություն», ինչին, ըստ նրա, համարժեք բառ անգամ դժվար է գտնել։ Լրագրողների հետ զրույցում նա նշեց, որ նման երևույթներ բացարձակ կապ չունեն խորհրդարանական մշակույթի հետ։

Ռուստամյանը ընդգծեց, որ իշխանությունները չեն գիտակցում իրենց պատասխանատվությունը՝ արձանագրելով, որ հասարակությունը տեսնում ու լսում է ոչ միայն ԱԺ-ում տեղի ունեցող խոսակցությունները, այլև դրանց ազդեցությունը և արձագանքը դրսում. «Ամենախայտառակ բնորոշումներն են հնչում թե՛ այս խորհրդարանի, թե՛ իշխանությունների հասցեին»։

Ըստ նրա՝ իշխանությունների վարքագիծը նման է նախապես ստացած հրահանգի կատարմանը, մանավանդ որ ընտրությունները մոտենում են։ Նա նշեց, որ հնարավոր է նույնիսկ մրցանակ լինի սահմանված՝ այն պատգամավորի համար, ով առավել վիրավորական արտահայտություններ կօգտագործի։

Անդրադառնալով Լևոն Քոչարյանի պահվածքին՝ Ռուստամյանը շեշտեց, որ նա իրեն չափազանց կոռեկտ է դրսևորել՝ հավելելով. «Ես զարմացել եմ, թե ինչպես է կարողացել այդ ամենը այդքան համբերատար տանել։ Նրա հասցեին հնչած խոսքերը ցանկացածը չէր դիմանա։ Իսկ արդյոք նորմալ է, որ ԱԺ փոխխոսնակը հրապարակային կերպով վիրավորում է մարդու ողջ տոհմը։ Սա անընդունելի է»։

Պատգամավորը նաև ընդգծեց, որ եթե ցանկանա, ինքն էլ կարող է շատ խոսքեր ասել՝ հղում անելով հանրային կարծիքին, սակայն նման գործելակերպը ճիշտ չի համարում։