Պարսից ծոցի արաբական միապետություններ ԱՄՆ նախագահ Դոնալդ Թրամփի շրջայցի ֆոնին իսրայելական մամուլը մի քանի հրապարակումներում քննարկել են նրա և Բենիամին Նաթանյահուի միջև սառնությունը և առանձնացրել երեք հիմնական պատճառ:
Առաջին տեղում Իրանի միջուկային ծրագիրն է: Իսրայելցի մեկնաբանները պնդում են, որ Նաթանյահուին «ծխիստ անհանգստացրել է Թրամփի հայտարարությունը, որ վերջնական որոշում չունի՝ Իրանը կպահպանի՞ ուրանի հարստացման իրավունքը, թե՞՝ ոչ:
Նաթանյահուի դժգոհության երկրորդ պատճառն այն է, որ Միացյալ Նահանգները միակողմանիորեն դադարեցրել է Եմենի հութիների ռազմակայանների և ենթակառուցվածքների ռմբակոծությունները, ընդ որում՝ առանց այդ մասին նախապես Իսրայելին տեղյակ պահելու:
Երրորդ «հարվածը» Նաթանյահուն ստացել է, երբ շատ անսպասելի պարզվել է, որ ԱՄՆ հատուկ ծառայությունները ՀԱՄԱՍ-ի հետ Թուրքիայի և Եգիպտոսի միջնորդությամբ բանակցություններ են վարել և հասել Իդան Ալեքսանդրի հայրենադարձությանը:
Ինչպես իսրայելական Ynet-ն է գրում, Նաթանյահուն այդ մասին իմացել է, երբ Վաշինգտոնից նրան տեղեկացրել են, որ Ալեքսանդրին դիմավորելու համար ԱՄՆ նախագահի հատուկ ներկայացուցիչ Ուիթկոֆն ուղևորվում է Իսրայել:
Նաթանյահուի համար, ամենայն հավանականությամբ, հաճելի չի եղել նաև ԱՄՆ նախագահի և Սիրիայի անցումային կառավարության ղեկավար Ահմադ ալ-Շարաայի հանդիպումը, բայց իսրայելցի փորձագետները նրա և Դոնալդ Թրամփի միջև սառնության այս երեք պատճառներն են հիմնական համարում:
Մերձավոր Արևելքից տունդարձի ճանապարհին լրագրողները Թրամփին հարցրել են Իսրայելի վարչապետի հետ հարաբերությունների մասին: ԱՄՆ նախագահը գովել է «Բիբիի վճռականությունը» և ասել, որ նա հայտնվել է շատ բարդ իրավիճակում:
Թրամփը ՀԱՄԱՍ-ի կողմից Իսրայելի հարավային շրջանները ներխուժումն անվանել է «մեծագույն ողբերգություն»: Նա բացահայտել է, որ Պարսից ծոցի արաբ միապետերից մեկն իրեն խնդրել է Գազան «փրկել սովամահությունից»:
Այս մանվածապատ դիտարկումներից հետո Միացյալ Նահանգներն անդրադարձել է Իրանի հետ բանակցություններին և վերստին պնդել, որ Թեհրանին գրավոր առաջարկություններ է ներկայացրել:
Նա հույս է հայտնել, որ իրանական կողմը «գործարքի պայմանները կընդունի»: Թրամփն ասել է, որ Իրանը «նստած է նավթի և գազի անսպառ պաշարների վրա և միջուկային էներգիայի կարիք չունի»:
Ասվածից հասկացվում է, որ ԱՄՆ-ն Թեհրանին առաջարկել է հրաժարվել միջուկային ծրագրից, եթե անգամ նպատակը խաղաղ էներգիայի ստացումն է: Ըստ երևույթին, Թրամփի այդ հայտարարության հասցեատերը նաև Իսրայելի վարչապետ Նաթանյահուն է, որ, ինչպես հայտնի է, իրանա-ամերիկյան բանակցությունների մեկնարկին հայտարարել է, որ խնդրի լուծման միակ տարբերակն իրանական միջուկային օբյեկտների ոչնչացնումն է՝ ինչպես դա կատարվել է Լիբիայում:
Իրանի միջուկային ծրագրի մասին Թրամփի վերջին հայտարարությանը շատ հստակ հակադարձել է Իրանի նախագահ Փեզեշքիանը. «Մենք բանակցում ենք, բայց ոչ մի սպառնալիքից չենք վախենում»: Ավելի վաղ մամուլում տեղեկություն է հայտնվել, որ Իրանն առաջարկում է ԱՄՆ մասնակցությամբ միջազգային կոնսորցիում ստեղծել, որ կզբաղվի խաղաղ նպատակներով ուրանի հարստացման և արտահանման ծրագրով:
Թեհրանն, ընդսմին, առաջարկում է միջուկային վառելիք տրամադրել Պարսից ծոցի արաբական երկրներին: Դիտարժան է, որ Դոնալդ Թրամփի Մերձավոր Արևելքում գտնվելու օրերին Իրանի փոխարտգործնախարար Ղարիբաբադին Ստամբուլում բանակցություններ է վարել Մեծ Բրիտանիայի, Ֆրանսիայի և Գերմանիայի պաշտոնակիցների հետ:
Իսրայելի վարչապետն ինչպե՞ս կարձագանքի Իրանի միջուկային ծրագրի մասին ԱՄՆ նախագահի հայտարարությանը: Դոնալդ Թրամփը վերջին մեկ շաբաթվա ընթացքում մի քանի միմյանց հակասող հայտարարություններ է արել:
Գործնականում, սակայն, Մերձավոր Արևելք նրա շրջայցի արդյունքները շատ պրագմատիկ են: Խոսքը շուրջ երկու տրիլիոն դոլարի ներդրումային ծրագրերի մասին է: Իսկ Իսրայելում ներքաղաքական իրավիճակն անկայուն է: Վաղը Բիբին կարող է հեռանալ:
Բաց մի թողեք
ԱՄՆ ռազմաօդային ուժերը հարվածներ են հասցրել Իրանի տարածքում գտնվող մի քանի կարևոր օբյեկտների, Իրանը սպառնում է պատասխանել․ Լուսանկար
Իրանաիսրայելական առճակատման ֆոնին ակտիվացել է իրանական վերջին միապետի որդին՝ գահաժառանգ արքայազն Ռըզա Փեհլեւին
Կաթողիկոսն իրավունք ունի քաղաքական ուժ ընտրելու, իսկ վարչապետը Կաթողիկոս՝ ոչ