Ռուսաստանին ի՞նչ է սպասում հետկոնֆլիկտային փուլում

Ռուսաստանի Անվտանգության դաշնային ծառայությունը Ստավրոպոլի երկրամասում ձերբակալել է անչափահասների հանցախումբ, որ Հաղթանակի օրը նախապատրաստել էր ահաբեկչությունների շարք:

Այդ մասին հաղորդում է ՌԻԱ-Նովոստի պետական գործակալությունը՝ հղում անելով ԱԴԾ Հանրային կապերի կենտրոնի տարածած պաշտոնական հաղորդագրությանը:

«Ռուսաստանի Դաշնության Անվտանգության դաշնային ծառայությունը, համագործակցելով Քննչական կոմիտեի և ներքին գործերի նախարարության հետ, Ստավրոպոլի երկրամասի տարածքում կանխել է ահաբեկչական բնույթի մի շարք հանցագործություններ:

Ձեռնարկած միջոցառումների արդյունքում ձերբակալվել ինը տեղի բնակիչ, բոլորն էլ ՌԴ քաղաքացի, որ միջազգային ահաբեկչական կազմակերպության հետևորդներ են»,- ասված է ԱԴԾ Հանրային կապերի կենտրոնի հաղորդագրության տեքստում:

Ըստ այդմ, Անդրոպովյան շրջանի բնակիչ դեռահասն անցյալ տարի Telegram-ի միջոցով անդամակցել է միջազգային ահաբեկչական կազմակերպությանը, իսկ հետո ներգրավել նաև ութ անձանց, որոնցից միայն մեկն է 18 տարեկան:

Նրանք ծրագրել էին մայիսի 9-ին «Ստավրոպոլի երկրամասի մունիցիպալիտետներից մեկի ոստիկանական բաժանմունքի վրա հարձակում գործել, բայց մտադրությունն իրականացնել չի հաջողվել, քանի որ նախօրեին ուժայինները ձերբակալել են առաջնորդին, իսկ այնուհետև խմբավորման անդամներին»:

Հարուցված է քրեական գործ: Ձերբակալվածներին ներկայացված է ահաբեկչական խմբավորում ստեղծելու, դրան անդամակցելու, ինչպես նաև միջազգային ահաբեկչությանն աջակցելու մեղադրանք: Նրանց նկատմամբ դատարանը խափանման միջոց է ընտրել կալանքը, նախաքննությունը շարունակվում է:

Ռուսաստանի պետական քարոզչությունը, որ անձամբ ձևավորում և ուղղորդում է նախագահ Վլադիմիր Պուտինը, Ուկրաինայի դեմ պատերազմը համեմատում է Մեծ Հայրենականի հետ և պնդում է, որ «նեոնացիզմի դեմ պայքարում ժողովուրդը միասնական և միակամ է»:

Ստավրոպոլի երկրամասի Անդրոպովյան շրջանում դեռահասների «ահաբեկչական խմբավորման բացահայտումը» հակառակն է վկայում:

Ընդ որում, ԱԴԾ-ն խոստովանում է, որ դեռահասները ոչ թե ուկրաինական հատուկ ծառայությունների կողմից են հավաքագրվել և ահաբեկչություն իրականացնելու հրահանգ ստացել, այլ նրանցից մեկը կամավոր անդամակցել է «միջազգային ահաբեկչական խմբավորման, ապա ներգրավել ևս ութ անձի»:

Ձերբակալված բոլոր ինն անձինք Ռուսաստանի Դաշնության քաղաքացիներ են: Նրանց ինքնությունը չի բացահայտվում: Ստավրոպոլի երկրամասը սահմանակցում է Հյուսիսային Կովկասին, որտեղ գրեթե ամեն օր արձանագրվում են «արտակարգ պատահարներ»:

Այն դեպքում, երբ Ռուսաստանի նախագահը հպարտանում է ուկրաինական ռազմաճակատում «կռվող տասնյակ հազարավոր կամավորականներով», ԱԴԾ տարածած հաղորդագրությունը փաստում է Վլադիմիր Պուտինի բարոյական պարտությունը. մի երկիր, որի դեռահաս քաղաքացիները ֆաշիզմի դեմ հաղթանակի տոնը ծրագրել էին նշանավորել ոստիկանական բաժանմունքի դեմ հարձակմամբ, չի կարող իրեն հաղթող անվանել:

Իսկ թե Ռուսաստանին ի՞նչ է սպասում հետկոնֆլիկտային փուլում, երբ հարյուր հազարավոր «կամավորականներ» կվերադառնան քաղաքացիական կյանքի, նույնիսկ ռուսաստանցի փորձագետներն են դժվարանում կանխատեսել: