Երևանն ինչու է անարձագանք թողնում Պեկինի առաջարկը

Նիկոլ Փաշինյանը ընդունել է Հայաստանում Չինաստանի նորանշանակ դեսպան Լի Սինվեյին, որի հետ քննարկել է հայ-չինական երկկողմ գործակցության հարցեր: Խոսվել է նաև բարձր մակարդակի փոխայցելությունների կազմակերպման մասին:

Նիկոլ Փաշինյանը Չինաստանի նախագահ Սի Ցզինպինի հետ շփում էր ունեցել մայիսի 9-ին Մոսկվայում կայացած միջոցառումների շրջանակում:

Իհարկե, կարճատև այդ շփումները չեն կարող ենթադրել որևէ առանցքային բովանդակություն: Իսկ թե ինչպիսի բովանդակություն կա այսօր Հայաստանի ու Չինաստանի երկկողմ օրակարգում՝ այնքան էլ պարզ չէ:

Ավելին, շատ վաղուց չկա, ըստ էության, պաշտոնական կամ աշխատանքային ձևաչափի բարձր մակարդակի շփում: Իսկ այդ շփումների բացակայությունը այն մասին է, որ բացակում է նաև այդ մակարդակին համարժեք օրակարգ:

Այստեղ թերևս «գնդակը» Երևանի դաշտում է, համենայն դեպս այն բանից հետո, երբ ապրիլի սկզբին հայ-չինական հարաբերության 33-ամյա տարեդարձի կապակցությամբ հոդված էր հրապարակել այն ժամանակ դեռևս Չինաստանի գործերի ժամանակավոր հավատարմատարը:

Այդ հոդվածում հանգամանալից անդրադառնալով հայ-չինական հարաբերությանը, նա, ըստ էության, Երևանին ներկայացրել էր կոնկրետ օրակարգային կենտրոնացում՝ Գլոբալ հարավի համատեքստում:

Երևանը, սակայն առայժմ, կարծես թե, չի արձագանքել դրան: Իհարկե, արձագանքի հնարավոր ձևաչափերը տարբեր են, և խոսքը, անշուշտ, թե՛ պատասխան հոդվածի և թե՛ հոդվածի առիթով Չինաստանին որևէ ուղերձի մասին չէ:

Պարզապես պաշտոնական Երևանն այդ ընթացքում որևէ «առիթ» չի «փնտրել» վարչապետի կամ ԱԳ նախարարի, կամ թեկուզ փոխնախարարի, կամ նույնիսկ Չինաստանում Հայաստանի դեսպանի մակարդակով այդ թեմատիկային անդրադառնալու համար:

Սա նշանակում է, որ Երևանը գոնե առայժմ թերևս անարձագանք է թողնում օրակարգային այն ուղղությունը, որ առաջարկում է Պեկինը:

Մինչդեռ, այսօր գլոբալ երկխոսության մակարդակում առնվազն ընդհանուր եզրերի դուրս չգալու պարագայում, հազիվ թե հնարավոր լինի դուրս գալ երկկողմ փոխհարաբերության տնտեսական արդյունավետության:

Հնարավոր է, որ Երևանը Չինաստանին «գլոբալ» ուղերձի համատեքստում իր մոտեցումները փոխանցել է նորանշանակ դեսպանի և վարչապետ Փաշինյանի հանդիպմանը:

Այդ հանգամանքը «ստուգելու» հնարավորություն կլինի տեսանելի ապագան և դրանում հայ-չինական հարաբերության որևէ բարձր մակարդակի հաղորդակցության դինամիկան: