ԱՄՆ-ը ստեղծում է «Ոսկե գմբեթ» հրթիռային պաշտպանության գերարդիական համակարգ՝ երկրի ամբողջ տարածքը պաշտպանելու նպատակով

ԱՄՆ նախագահ Դոնալդ Թրամփը մայիսի 20-ին հայտարարեց նոր հրթիռային պաշտպանության համակարգի մեկնարկի մասին, որն անվանվել է «Ոսկե գմբեթ»։

Նախագծի նպատակն է ստեղծել ամբողջ ԱՄՆ տարածքը ընդգրկող պաշտպանական վահան՝ միջմայրցամաքային հրթիռային հարվածներից զերծ պահելու համար։ «Ոսկե գմբեթի» նախակծային արժեքը կազմում է 175 միլիարդ դոլար։

Ծրագրի ներկայացմանը մասնակցում էին պաշտպանության նախարար Փիթ Հեգսեթը և ԱՄՆ Տիեզերական ուժերի հրամանատար, գեներալ Մայքլ Գյուտլայնը։ Թրամփը նախաձեռնությունն անվանեց «Ամերիկայի պաշտպանության մեջ նոր դարաշրջանի սկիզբ», ընդգծելով, որ այն մի քանի անգամ ավելի ընդգրկուն ու տեխնոլոգիապես զարգացած է լինելու, քան ցանկացած առկա համակարգ։

«Մենք գործարկում ենք մի համակարգ, որը պաշտպանելու է Ամերիկայի յուրաքանչյուր սանտիմետրը՝ տիեզերքից վերահսկվող արբանյակներով, արհեստական բանականությամբ ու ամենաառաջատար տեխնոլոգիաներով։ Սա ոչ միայն պաշտպանություն է, այլ՝ հպարտության հիմք բոլոր ամերիկացիների համար», — ասաց Թրամփը։

Համակարգը հիմնվելու է սենսորների, հրթիռների և արբանյակային հարթակների ցանցի վրա, որոնք ի վիճակի են լինելու որսալ և խոցել թշնամու հրթիռները դեռ թռիչքի փուլում։ Նախագծի իրագործման առաջին փուլին տրամադրվել է 25 միլիարդ դոլար, իսկ համակարգի իրականացման պատասխանատվությունը վերապահվել է գեներալ Գյուտլայնին։

Թրամփը նաև շեշտեց նախագծի տնտեսական նշանակությունը. «Սա միլիարդավոր դոլարների ներդրում է ամերիկյան արդյունաբերության մեջ՝ աշխատատեղեր Միչիգանում, Տեխասում, Օհայոյում։ Սա պարզապես ռազմավարական ծրագիր չէ, այլ տնտեսական շարժիչ»։

Հայտարարությունը լայն արձագանք ստացավ նախագահին աջակցող շրջանակներում, հատկապես «X»-ում, որտեղ օգտատերերը այն համարեցին հստակ պատասխան աճող գլոբալ սպառնալիքներին։

Թրամփը եզրափակեց իր խոսքը հետևյալ ձևակերպմամբ․ «Սա լինելու է մեր ազգային ուժի փայլուն խորհրդանիշը՝ մի բան, որը աշխարհը դեռ երբեք չի տեսել։ Մենք այն կառուցելու ենք ավելի արագ, քան որևէ մեկը կսպասի»։