Ինչպես հայտնի է՝ այս իշխանության գաղափարական եւ, կասեի, կազմակերպչական հիմքն է ատելությունն ու թշնամանքը: Դրա թիրախները կարող են տարբեր լինել՝ «նախկինները», ռուսները, հոգեւորականները, Սամվել Կարապետյանը կամ որեւէ այլ գործիչ:
Կարեւորը ատելության այդ կրակը թեժ պահելն է: Իմ տպավորությամբ՝ Հայաստանի վարչապետն ամեն օր արթնանում է այն մտքով, թե է՛լ ինչ ֆեյսբուքյան ստատուս պիտի գրի, որ սկանդալ, վեճ, գզվռտոց առաջացնի:
Որ երկրպագուներն ու ընդդիմախոսները, զարգացնելով թեման, իրար մասին հնարավորինս կեղտոտ եւ վիրավորական գրառումներ ունեն: Ատելության հիմնական օբյեկտներից են արցախցիները, եւ դա, իհարկե, ունի իր բացատրությունը. այդ մարդկանց վիճակի համար մեղավորները չեն ընդունում իրենց մեղքը, եւ նման դեպքերում լավագույն պաշտպանությունը հարձակումն է:
Իշխանությունը մեզ փորձում է համոզել, որ արցախցիներն արժանի չեն օգնության, նրանք ռուսական ազդեցության գործակալներ են, ուզում են տապալել մեր ազգընտիր եւ վսեմաշուք վարչապետին: Եվ ընդհանրապես պետք է պարզել՝ արդյոք նրանք հա՞յ են:
Ահա այդ «հեյթի» ալիքներն է իշխանությունը պարբերաբար ուղղորդում մեր հայրենակիցների դեմ, եւ դա ծայրահեղ ցինիզմ է՝ հաշվի առնելով, թե ինչ վիճակում են այդ մարդիկ: 120 հազար մարդ զրկվել է ամեն ինչից՝ տնից, աշխատանքից, ծնողների եւ պապերի գերեզմաններից:
Պետությունը նրանց մասին «մոռացել» է՝ այն չնչին նպաստը, որը տալիս էր, դա էլ շատ համարեց, իսկ իրականում իշխանությունները ցանկանում են, որ նրանք որքան հնարավոր է՝ շուտ գնան Հայաստանից:
Այդ մարդկանց վիճակն իրապես ողբերգական է: Դուք, հավանաբար, տեսել եք, թե ինչպես են նրանք ջարդուխուրդ եղած «Ժիգուլիի» տանիքին կապում 30-40 տարվա պահարան, որ քշեն «ռայոն»՝ միայն այնտեղ են նրանք կարողանում մի անկյուն վարձել:
…Այդ ողբերգական ֆոնի վրա այն փաստը, որ «Առավոտին» վտարում են Մամուլի շենքից, փոքրիկ անախորժություն է, որի մասին չարժե երկար խոսել: Ի դեպ, օգոստոսի 2-ին «Առավոտը» դառնում է 31 տարեկան:
Արամ ԱԲՐԱՀԱՄՅԱՆ; aravot.am
ՄԻՏՔ․am լրատվական – վերլուծական կայքը ևս շնորհավորում է ավագ գործընկերոջը՝ Առավոտ օրաթերթին ու համանուն լրատվական – վերլուծական կայքին 31-րդ տարեդարձի կապակցությամբ, և հայտնում՝ անսահման աջակցությունը «Առավոտ»-ին, ողջ խմբագրակազմին՝ Արամ Աբրահամյանի ու Աննա Իսրայելյանի գլխավորությամբ։
Բաց մի թողեք
«Ալիևը և Փաշինյանը Զելենսկու դժբախտության ճանապարհին». ԻՀՊԿ գեներալ
Կոչել «հաղթանակ» կամ թեկուզ «ձեռքբերում» ու հրճվե՞լ դրանով` ուղղակի դուրս է առողջ տրամաբանությունից
Ինչո՞ւ զարմանալ Նիկոլ Փաշինյանի ստերից, երբ «Արցախը Հայաստան է և վերջ» գոչելուց հետո հրաժարվեց Արցախից․ Կոստանյան