Վաղարշապատի համայնքապետի պաշտոնակատար Արգիշտի Մեխակյանը նոյեմբերի 16-ին կայանալիք ՏԻՄ արտահերթ ընտրությունից առաջ համայնքային ենթակայության հիմնարկներում քաղաքական «չիստկա» է սկսել։
Հրապարակ թերթը գրել է․ Նախօրեին իր դիմումի համաձայն աշխատանքից ազատվելու հրահանգ է իջեցրել Էջմիածնի 13-րդ մանկապարտեզի տնօրեն Աննա Սողոմոնյանին՝ զուտ այն պատճառով, որ վերջինս ընդդիմադիր «Էջմիածին դաշինք» խմբակցության ղեկավար Սեւակ Խաչատրյանի քեռու կինն է։
Ըստ մեր աղբյուրի՝ Մեխակյանն իր մոտ է հրավիրել մանկապարտեզի տնօրենին, մոտ 30 րոպե սպասեցրել ընդունարանում, ապա կանչել ու ասել՝ դիմում գրի, ազատվի պաշտոնից։ «Մենք հակառակ բեւեռներում ենք, իրար հետ չենք կարող աշխատել»,- ասել է Մեխակյանը։
Տնօրենի՝աշխատանքից ազատվելու մասին լուրը ցնցել է մանկապարտեզի աշխատակազմին ու ծնողներին։ Օգոստոսի 21-ին նրանք, ի նշան բողոքի, երեխա չեն ընդունել մանկապարտեզ․ գնացել են Էջմիածնի համայնքապետարան՝ իրենց անհամաձայնությունը հայտնելու։ Մեխակյանի փոխարեն աշխատակիցներին լսել է ինչ-որ պաշտոնյա, որին չեն ճանաչել։
«Որ ղեկավարը եկավ, հետն իր մարդկանց բերեց, չենք հասցնում նույնիսկ դեմքերը ֆիքսել։ Սրան էլ առաջին անգամ էինք տեսնում»,-ասաց մանկապարտեզի աշխատակիցը, որի փոխանցմամբ՝ իրենց լսող պաշտոնյան ասել է, որ ոչինչ անել չեն կարող, քանի որ Աննա Սողոմոնյանն ինքն է դիմում ներկայացրել՝ հեռանալու մասին։
«Թող լոլոներ չկարդան, Մեխակյանը պարզ ասել է՝ հակառակ բեւեռներում ենք, եւ վերջ։ Եթե իրեն թվում է, թե մանկապարտեզը խառնվել է կամ կխառնվի քաղաքականությանը, չարաչար սխալվում է։ Հետո՞ ինչ, որ Սողոմոնյանը Սեւակի քեռու կինն է։ Հո չի՞ կարող դրանից հրաժարվել, ինչ է թե՝ Մեխակյանը կասկածներ չունենա։ Ամոթ է, չի կարելի աշխատող, պրպտող մարդուն աշխատանքից ազատել՝ ընդդիմադիր բարեկամ ունենալու պատճառով։
Եթե Մեխակյանին թվում է՝ ընդդիմադիրների բարեկամներից ազատվելով ամրապնդում է դիրքերը, ասեմ, որ մոլորության մեջ է։ Ընդհակառակը, այդ քայլով քաղաքին տրամադրում է իր դեմ, որովհետեւ Էջմիածնի կեսը Սողոմոնյան Աննայի բարեկամներն ու ծանոթներն են, մյուս կեսը՝ նրա տղաների եւ ամուսնու։ Ամուսինը, ի դեպ, ոստիկանության գնդապետ է, հիմա էլ, եթե չեմ սխալվում, Մաշտոցի ոստիկանապետն է։
Իսկ ո՞վ է Արգիշտի Մեխակյանն Էջմիածնի համար․ գյուղից եկած մի տղա, որ դեմ գնալով ազատամարտիկ հոր սկզբունքներին, ներգրավվեց ՔՊ-ի շարքերն ու հանուն պաշտոնի՝ ուրացավ ծնողի հերոսական անցյալը։ Հիմա էլ հայրենիքը ծախողների կողքին քաղաքական կենսագրություն է կերտում՝ թացն ու չորն իրար խառնած»,- ասաց մանկապարտեզի աշխատակիցը։
Մեր տեղեկություններով, Արգիշտի Մեխակյանը 13-րդ մանկապարտեզի տնօրենի պաշտոնը խոստացել է իր կնոջ զարմուհուն։ Իսկ Մեխակյանի կինը Մանվել Գրիգորյանի առաջին կնոջ քրոջ դուստրն է։
Բաց մի թողեք
Տեր-Պետրոսյանի հրաժարականը ոչ թե փախուստ էր, այլ սեփական լուծումն ազգի վզին չփաթաթելու պետական գործչի որոշում
Հիմա էլ չեն բացառում, որ Փաշինյանը առաջիկա շաբաթներին հայտարարի արտահերթ ընտրությունների գնալու մասին
Զեյնաբ Խանլարովա էին լսում, հայկական ռադիոյով առավոտից իրիկուն հնչում էր ազերական երաժշտություն