Կարեն Անդրեասյանի եփած բորշչը իշխանությունը չի մարսում

Արդարադատության նախկին նախարար, ապա Բարձրագույն դատական խորհրդի նախագահ Կարեն Անդրեասյանի ձեռքով Նիկոլ Փաշինյանը մեծ խումբ փորձառու դատավորներից ազատվեց` նրանց լիազորությունները ԲԴԽ-ն դադարեցրեց:

Հրապարակ թերթը գրել է․ Իսկ հիմա նրանք հերթով հաղթում են եւ վերականգնում իրենց ոտնահարված իրավունքները․ մեկը` ՍԴ-ում, մյուսը` ՄԻԵԴ-ում, եւ որոշ ժամանակ անց կսկսեն նաեւ վերականգնվել իրենց պաշտոններում:

Ժամանակին տարբեր մակարդակներից իշխանություններին զգուշացնում էին, որ չգնան նման ապօրինությունների եւ չփորձեն հպատակեցնել դատական համակարգը` այն համալրելով կամակատարներով եւ հին դատավորներին ազատելով, որովհետեւ գալու է նաեւ այս օրը` նրանք վերականգնվելու են կամ էլ ուղղակի պետբյուջեից ստանալու են չաշխատած տարիների աշխատավարձը:

Ոչ վաղ անցյալում Բարձրագույն դատական խորհրդի նախագահ Կարեն Անդրեասյանի եւ նրա ընկերոջ` արդարադատության նախարար Գրիգոր Մինասյանի «թեթեւ ձեռքով» ազատվեցին հենց նրանցից, ովքեր դատական համակարգում անկախ, քաղաքական հրահանգներ չկատարող դատավորների համբավ ունեին, այդ թվում՝ Դավիթ Հարությունյանից, Դավիթ Գրիգորյանից, Վահե Միսակյանից, Աննա Դանիբեկյանից, Սուրեն Անտոնյանից, Արթուր Ստեփանյանից, Աննա Փիլոսյանից, Զարուհի Նախշքարյանից…։

Հանուն արդարության նշենք, որ դեռեւս նախորդ տարվա վերջին ԲԴԽ նախագահ ընտրված Արթուր Աթաբեկյանի նախագահության շրջանում դեռեւս ոչ մի դատավորի լիազորություններ չեն դադարեցվել։ Գրիգոր Մինասյանի իրավահաջորդը՝ Սրբուհի Գալյանը, շարունակում է ինտենսիվորեն կարգապահական վարույթներ հարուցել դատավորների դեմ, սակայն դրանք ԲԴԽ-ում ավարտվում են հիմնականում «նկատողություններով»։

Թերեւս այստեղ էլ նույն «չար» մեխանիզմը գործում է` քաղաքական գործերով իշխանահաճո որոշումներ կայացնող դատավորների դեմ կա՛մ վարույթներ չկան, կա՛մ էլ, եթե հարուցվում են, թեթեւ պատիժներով են ավարտվում։

Օրինակ, հայտնի իշխանական դատավոր Մասիս Մելքոնյանի դեմ կարգապահական վարույթը, որը հարուցել եւ ԲԴԽ էր ուղարկել Դատավորների ընդհանուր ժողովի էթիկայի եւ կարգապահական հարցերի հանձնաժողովը, Խորհրդում փլվեց: Պատճատը միանգամայն պարզ է․ նա 2 ամիս առաջ կալանավորել է Բագրատ եւ Միքայել սրբազաններին։ Թեպետ Մելքոնյանն ընդունել էր մեղքը՝ հայտարարելով, որ «շփոթվել» է, այդուհանդերձ, ԲԴԽ-ն նրան միայն «նկատողություն» տվեց։

Երրորդ նախագահ Սերժ Սարգսյանին արդարացրած դատավոր Վահե Միսակյանը եւս նկատել է, որ դատավորների լիազորություններն այլեւս չեն դադարեցվում․ «Փաստացի ոնց որ թե ինչ-որ մեկի լիազորությունները չեն դադարեցվում»։

Ինչո՞վ է դա պայմանավորում նախկին դատավորը։ «Ողջամիտ ենթադրություն կարող է լինել այս ամեն ինչի հետ կապված, եթե նկատի ունեք Անդրեասյան Կարենի ֆակտորը` այս պահին Եվրադատարանում քննվող բողոքիս մեջ ներկայացրել եմ, փաստարկներիցս մեկն էլ դա է, բայց այս պահին հրապարակային ներկայացնելու անհրաժեշտություն չեմ տեսնում»։

Գուցե դատավորներին հանգիստ թողնելու պատճառներից մեկն էլ դա է` որ նախորդ որոշումները չեն մարսել, եւ պարզ է, որ ՄԻԵԴ-ից դեղին քարտ են ստացել ու հասկացել, որ չեն կարող անպատիժ շարունակել դատական համակարգի քաղաքական զտումները: