Վերջին իրադարձությունը, երբ Ամենայն Հայոց Կաթողիկոսը հրաժարվեց ցուցմունք տալ դատարանի առաջ, շատերի համար անակնկալ չէր։ Հանրությունը դա ընկալեց որպես կանխատեսելի քայլ․ իսկ ինչո՞ւ պետք է Ամենայն Հայոց Կաթողիկոսը ցուցմունք տա դատարանին, եթե իր ծառայության բնույթը նախ և առաջ հոգևոր է, ոչ վարչական։
Կաթողիկոսը հրավիրվել է հարցաքննության և օգտվել է օրենքով տրված իրավունքից՝ չտալ ցուցմունք։ Իրավական տեսանկյունից սա սովորական ընթացակարգ է։
Բայց հասարակական ընկալման մեջ այս քայլը ստացավ ավելի լայն իմաստ։ Մեղադրանքի ձևակերպումը՝ դատական ակտի կատարմանը խոչընդոտում, կապված է Գևորգ եպիսկոպոս Սարոյան-ի կարգալուծման հարցի հետ։ Նույն գործով անցնում են նաև մի շարք բարձրաստիճան հոգևորականներ։ Եվ հենց այստեղ է շարքային քաղաքացու մոտ առաջանում ամենապարզ հարցը՝ եթե խոսքը վերաբերում է եկեղեցական կարգապահական որոշմանը, ապա ինչու՞ է պետությունը միջամտում եկեղեցու ներքին կյանքին։
Նույնիսկ դպրոցականը գիտի, որ եկեղեցին և պետությունը Սահմանադրությամբ անջատ են։ Եկեղեցու ներսում թեմի ղեկավարի նշանակումը կամ ազատումը եկեղեցական իրավասության հարց է։ Երբ այդ գործընթացը տեղափոխվում է քրեական դաշտ, բնական է, որ հասարակության մեջ ձևավորվում հիմնավորում՝ սա պետություն-եկեղեցի հարաբերությունների լարված փուլ է։ Առավել ևս, երբ տեղեկություններ են շրջանառվում, որ Կաթողիկոսի և մի շարք Սրբազանների ելքը երկրից արգելվել է, որպեսզի խոչընդոտվի Ավստրիայում նախատեսված եկեղեցական ժողովին։ Եթե դրանց գումարվում են Բարձրաստիճան այլ սրբազանների ձերբակալություններն ու մեղադրանքները, հարցը դուրս է գալիս մեկ անձի շրջանակից և դառնում համակարգային։
Այս պայմաններում Կաթողիկոսի լռությունը շատերի համար վերածվում է ուղերձի։ Նա չի մտնում իրավական բանավեճի մեջ, չի արդարանում, չի հակադարձում։ Նրա դիրքորոշումը ձևակերպվում է մեկ նախադասությամբ՝ «Իմ հաշվետվությունը Աստծո առաջ է»։ Այս միտքը եկեղեցու ինքնընկալման մասին է։ Եկեղեցին իրեն չի դիտում որպես պետական կառույց կամ վարչական ստորաբաժանում։ Այն հավատքի հաստատություն է, որի առաջնորդի պատասխանատվությունը նախ և առաջ հոգևոր է։
Այստեղից էլ բխում է հասարակության համոզումը՝ եթե Կաթողիկոսը հաշվետու է, ապա Աստծո առաջ։ Իսկ երբ աշխարհիկ համակարգը փորձում է գնահատել հոգևոր որոշումները, սկսվում է այն պետական քաոսը, որի կենտրոնում այսօր գտնվում է Հայ Առաքելական եկեղեցին։
Եվ հենց այդ պատճառով սա դիտվում է ոչ թե որպես քրեական գործ , այլ սկզբունքային հարց՝ որտե՞ղ է ավարտվում պետության իրավասությունը, և որտե՞ղ է սկսվում եկեղեցու ինքնավարությունը, որը սահմանադրորեն խախտվում է պետության կողմից։
Գերմանալեզու domradio.de պարբերականն անդրադարձել է Հայաստանում կառավարության եւ Հայ Առաքելական եկեղեցու առճակատմանը։
Հոդվածում ասվում է, որ արդեն մի քանի ամիս է, ինչ Հայաստանում կառավարության եւ խոշորագույն Եկեղեցու՝ Հայ Առաքելական եկեղեցու միջեւ առճակատում կա։ Որոշ եպիսկոպոսներ աջակցում են վարչապետ Փաշինյանին, մյուսները՝ Գարեգին 2-րդին։ Այժմ արդեն Գարեգին 2-րդի դեմ է հանդես գալիս նաեւ արդարադատությունը։ Մասնավորապես, Հայաստանի դատախազությունը քրեական գործ է հարուցել Հայ Առաքելական եկեղեցու առաջնորդ Գարեգին 2-րդի դեմ։ Նրա առնչությամբ սահմանվել է երկրից բացակայելու արգելք։ Այս մասին դեռ կիրակի հայտնել էր ավստրիական Kathpress լրատվական գործակալությունը։ Հոդվածում ասվում է, որ այս իրավիճակի նախաբանը կապված է իշխանության համար հակամարտության հետ, որը ներառում է նաեւ երկրի արտաքին քաղաքականությունը։
Ընդ որում, հոդվածում ասվում է, որ հակամարտությունը եկեղեցու ղեկավարի եւ Նիկոլ Փաշինյանի միջեւ է, եւ նշվում, որ Հայաստանի բնակչության 93 տոկոսն իրեն համարում է առաքելադավան։ Անդրադարձ կա նաեւ Ավստրիայի Սանկտ-Պյոլտենում գումարվելիք եպիսկոպոսական ժողովին, որը պետք է տեղի ունենար Գարեգին 2-րդի նախագահությամբ։ Համաձայն Kathpress-ի, Հայաստանում քրեական գործ էր հարուցվել նաեւ վեց եպիսկոպոսների նկատմամբ, ովքեր պետք է մասնակցեին այդ ժողովին եւ նրանց նկատմամբ էլ սահմանվել է երկրից դուրս գալու արգելքը։
Նշվում է նաեւ Մասյացոտնի թեմի առաջնորդի պաշտոնազրկման մասին, որը պետական դատարանը ճանաչել է անվավեր։ Եկեղեցական ղեկավարությունը դատախազությանը մեղադրել է եկեղեցու ներքին գործերին միջամտելու եւ Գարեգին 2-րդի դեմ ձեռնարկված անօրինական եւ ոչ սահմանադրական գործողություններ իրականացնելու մեջ։ Կիրակի հրապարակված հայտարարությունում նշվում է, որ իրականացված գործողությունները կրում են քաղաքական բնույթ եւ վնասում են երկրի համբավին։ Ավստրիացի եպիսկոպոսները եւ եկեղեցու այլ ներկայացուցիչներ եւ փաստաբաններ արդեն մի քանի ամիս շարունակվող հակամարտության ընթացքում աջակցություն են հայտնել Գարեգին 2-րդին։
Բաց մի թողեք
Մեքենան դուրս է եկել Երևան-Երասխ ավտոճանապարհի երթևեկելի գոտուց և հայտնվել դաշտում. կա զոհ․ Լուսանկար
Հունիսի 7-ին կայանալիք ԱԺ ընտրություններին ընտրական իրավունք ունի 2 միլիոն 489 հազար 31 քաղաքացի. ԿԸՀ
Պայթյուն Թալինի բենզալցակայաններից մեկում․ այրվում են պահեստային բաքերը և մեկ բեռնատար. Լուսանկար