Իրանի հոգևոր առաջնորդ այաթոլլա Ալի Խամենեին «կարգադրել է մշակել ռազմական գործողությունների ժամանակ իր զոհվելու կամ իր հետ կապի խզման դեպքում երկրի արտակարգ կառավարման պլան մշակել»:
Այդ մասին գրել է «Նյու-Յորք թայմսը»՝ հղում անելով իսլամական հանրապետության «քաղաքական ղեկավարության և ԻՀՊԿ վեց վստահելի աղբյուրների»,- փոխանցել է ռուսաստանյան «Կոմերսանտը»:
Ըստ տեղեկությունների, Խամենեին «իշխանության բոլոր թևերի միջև կոորդիանցիա ապահովելու լիազորությունները վերապահել է Ազգային անվտանգության բարձրագույն խորհրդի քարտուղար Ալի-Արդաշիր Լարիջանիին»:
Լարիջանին Իրանի կրոնական-քաղաքական վերնախավի «հնաբնակներից» է, տևական ժամանակ պաշտոնավարել է որպես մեջլիսի նախագահ: Ներկա պաշտոնին նա նշանակվել է անցյալ տարվա օգոստոսին:
Փորձագետները դեռեւս այն ժամանակ են կանխատեսել, որ իրանական «Քենեդիների կլանը վերադառնում է իշխանության»: Այաթոլլա Խամենիի որոշումը, որով նա փաստացի իր լիազորությունների մեծ մասը վերապահել է Ալի-Արդաշիր Լարիջանիին, կարծես, հաստատում է այդ կանխատեսումը:
Բաց աղբյուրներից հայտնի է, որ Լարիջանին ունի չորս եղբայր: Նրանցից Սադիկ Լարիջանին տասը տարի գլխավորել է Իրանի դատական համակարգը և անգամ ունեցել է Խամենեիի իրավահաջորդի համարում:
Մոհամեդ Ջավադ Լարիջանին պաշտոնավարել է արտաքին գործերի փոխնախարար, ընդ որում՝ զբաղվել հիմնականում կադրային, հատկապես՝ արտերկրում ԻԻՀ դեսպանների նշանակման հարցերով, այնուհետև գլխավորել է մարդու իրավունքների պաշտպանության հանձնաժողովը:
Այդ պաշտոնում նա գերազանցապես զբաղվել է արտերկրում Իրանի դրական վարկանիշ ձևավորելու հարցերով: Նախկին դիվանագետ Ֆազիլ Լարիջանին ներկայումս դասախոսում է Թեհրանի Ազատ համալսարանում և հանդիսանում է Իրանի Իսլամական մշակույթի բարձրագույն խորհրդի անդամ:
Լարիջանիի մյուս՝ ամենակրտսեր եղբայր Բաքիրը զբաղեցրել է առողջապահության փոխնախարարի և Թեհրանի բժշկական համալսարանի ռեկտորի պաշտոնը:
Լարիջանիների կլանը ունի պահպանողականի համարում: Մեջլիսի նախագահի պաշտոնում Ալի Լարիջանին արգելափոկել է Իրանի միջուկային ծրագրի շուրջ համաձայնության վավերացումը, թեև նախապես հանդես է եկել Արևմուտքի հետ այդ հարցում համաձայնության հասնելու դիրքերից:
Եթե «Նյու-Յորք թայմսի» ունեցած տեղեկությունը վստահելի է, ապա կարելի է, թերևս, ենթադրել, որ Իրանի դեմ ռազմական գործողություններ սկսելու կամ «գործարք կնքելու» տասը-տասնհինգօրյա ժամեկտը, որ ԱՄՆ նախագահ Դոնալդ Թրամփն է սահմանել, փաստացի այաթոլլա Խամենեիին իշխանության տրանզիտ իրականացնելու համար տրված ժամկետ է:
Խնդիր է, թե արդյոք ԻՀՊԿ բարձրագույն հրամանատարությունը և իրանական բանակը կընդունե՞ն Լարիջանիի «ժամանակավոր կառավարությունը» և արդյոք նրան կհաջողվի՞ Թեհրանի կրոնաքաղաքական վերնախավի տարբեր թևերի միջև կոնսենսուս ապահովել:
Բարդ կարող է լինել նաև նախագահ Փեզեշքիանի հետ լիազորությունների վերաբաշխումը: Իրանում սոցիալական բողոքի օրերին նա թույլ է տվել շատ կարևոր դիտարկում անել, թե կառավարությունը «իրավիճակի պատասխանատուն է, բայց լուծումներ առաջարկելու լիազորություն չունի»:
«Նյու-Յորք թայմսի» հրապարակման դրական ազդակն այն է, որ, հավանաբար, ԱՄՆ-ը Իրանի դեմ ռազմական ուժի կիրառման տարբերակը «երկրարդային է գնահատում»: Իրանա-ամերիկյան պատերազմը ոչ միայն Մերձավոր Արևելքի, այլեւ գլոբալ անվտանգության համար սպառնալիք է:
Իրանում ներքին փոխակերպումները, կրոնական և աշխարհիկ վերնախավերի միջեւ ազդեցության և լիազորությունների վերանայումը և վերաբաշխումը, որ կարող է միջուկային ծրագրի շուրջ բոլոր առումներով էքզիստենցիալ լարվածություն դիվանագիտական կարգավորման դուռ բացել, ձեռնտու է տարածաշրջանի բոլոր երկրներին, այդ թվում, գուցե, առաջին հերթին՝ Հայաստանին:
Բաց մի թողեք
Փաշինյանը վերջապես խոստովանեց, որ Ալիևն ամենևին էլ խաղաղության չի ձգտում
Ինչպես Պուտինի սիրելի մարզաձևը վերաբացեց դեպի միջազգային մրցումներ տանող դուռը
Թրամփը կա՛մ «օգտակար հիմար» է, կա՛մ միտումնավոր թուլացնում է Եվրոպան