Պուշկինի փողոցի շենքերից մեկին պատկերված 44-օրյա պատերազմի մասնակիցների դիմանկարները ջնջելու ու փչացնելու դեպքով նախաձեռնվել է քրեական վարույթ՝ ՀՀ քրեական օրենսգրքի 297-րդ հոդվածի 1-ին մասի հատկանիշներով (խուլիգանություն)։
Ելնելով նախաքննության շահերից՝ այլ տվյալներ հիմա հրապարակման ենթակա չեն։ Այս մասին Aravot.am-ին ասաց ՀՀ Քննչական կոմիտեի նախագահի մամուլի քարտուղար Գոռ Աբրահամյանը:
Քիչ առաջ էլ ՀՀ ՆԳ նախարարի մամուլի քարտուղար Նարեկ Սարգսյանն էլ հայտնեց, որ Երևան քաղաքի վարչության և Կենտրոնական բաժնի ծառայողների ձեռնարկած ծավալուն օպերատիվ հետախուզական միջոցառումների շնորհիվ քիչ առաջ հայտնաբերվել և խուլիգանություն կատարելու կասկածանքով ձերբակալվել է մայրաքաղաքի 62-ամյա բնակիչ Հասմիկ Գ.-ն:
Այս կնոջ արարքը բուռն արձագանք է գտել համացանցում: Արարքը կատարող կնոջ հասցեին, բացի պարսավանքի խոսքերից, տարբեր օգտատերեր շրջանառել են նաեւ նրա՝ ազգությամբ ոչ հայ լինելու հանգամանքը: Մենք Քննչական կոմիտեի նախագահի մամուլի քարտուղարից հետաքրքրվեցինք՝ ինչ ազգություն ունի արարքի հեղինակը:
Ի պատասխան Գոռ Աբրահամյանն ասաց՝ ազգության պատկանելությունը քննությամբ պարզման ենթակա է, իսկ նախաքննության շահերից ելնելով՝ ավելին այս պահին չի կարող հայտնել:
«Ադրբեջանցիները ազատ Երեւանում շրջում են փաստորեն»,- հերոսների դիմանկարները ջնջող անձին ու նրա արարքը արձանագրած հայտնի տեսագրության հրապարակման տակ նման մեկնաբանություն է թողել փաստաբան Արսեն Բաբայանը: Իսկ երգչուհի Շուշան Պետրոսյանը կոչ է արել արագ գտնել այդ անձին ու հրապարակավ պախարակել:
Բաց մի թողեք
Առատ ձյան տեղումների հետևանքով հոսանքազրկված են բազմաթիվ բնակավայրեր
Հայաստանի հետ հարաբերություններում առաջ շարժվելու համար նախ անհրաժեշտ է համաձայնության գալ Ադրբեջանի հետ. Թուրք նախարար․ Լուսանկար
Ում ձիերն են մորթել Ծովագյուղում ու ցլիկի մսի անվան տակ իրացրել ԳՈՒՄ-ի շուկայում