Արդեն չորրորդ օրն է՝ ողջ երկիրը սպասում է Գյումրու ավագանու ընտրություններում անցողիկ քվեներ ստացած երրորդ ուժի՝ Մարտուն Գրիգորյանի հայտարարությանը. աջակցո՞ւմ է ամենաշատ քվեներ ստացած ընդդիմադիր Վարդան Ղուկասյանին, եւ ՔՊ-ին իշխանազրկո՞ւմ են հայրաքաղաքում, թե՞ չի կարողանում հաղթահարել ներանձնային կոնֆլիկտը եւ գնում է երրորդ ճանապարհով, այն է՝ Գյումրին տանելով արտահերթ նոր ընտրությունների։
Բանն այն է, որ մարտի 30-ի ընտրությունների հաջորդ օրը Մարտուն Գրիգորյանը սոցցանցի իր էջում երկու տող գրեց, որ Գյումրին ՔՊ-ական քաղաքապետ չի ունենա։ Այս երկիմաստ հայտարարությունը թերեւս նրա համար էր, որ կանգնեցներ իր հասցեին քննադատությունների տարափը՝ հակադարձելով, թե ինքը ՔՊ-ի հետ չէ:
Նրա շրջապատից էլ զուգահեռաբար վստահեցնում էին, որ մոտ օրերս Մարտուն Գրիգորյանը կհայտարարի Վարդան Ղուկասյանին անհրաժեշտ քվեներով ապահովելու մասին, սակայն իր որոշումը ձգելով՝ նա ցույց է տալիս, որ ընդդիմության հետ էլ չէ: Երեկ անգամ լուրեր տարածվեցին, որ նա չի աջակցելու Ղուկասյանին։ Գյումրիում արդեն խոսում են, որ իրադարձությունների զարգացման ամենահավանական սցենարը նոր արտահերթ ընտրություններն են։
Հիշեցնենք․ մարտի 30-ին Գյումրիում տեղի ունեցած ընտրությունների արդյունքներով ավագանու մանդատները հետեւյալ կերպ են բաշխվել․ ՔՊ-ն 14 մանդատ ունի, Վարդան Ղուկասյանը` 8, Մարտուն Գրիգորյանը՝ 6, Ռուբեն Մխիթարյանը՝ 3, Կարեն Սիմոնյանը` 2։ «Իմ հզոր համայնք» դաշինքի քաղաքապետի թեկնածու Ռուբեն Մխիթարյանն ու «Մայր Հայաստանի» թեկնածու Կարեն Սիմոնյանն անմիջապես հայտարարել են Վարդան Ղուկասյանին միանալու մասին, սակայն դա բավարար չէ մեծամասնություն ունենալու համար` 4 ձայն է պակասում, եւ եթե Մարտուն Գրիգորյանի ավագանու անդամները չտան այդ 4 քվեն, Ղուկասյանը քաղաքապետ չի ընտրվի։
Հրապարակ թերթը փորձել է Վարդան Ղուկասյանից պարզել, թե կա՞ն արդյոք բանակցություններ, եւ ի՞նչ հանգուցալուծում է սպասվում Գյումրիում։
– Երեք օր է՝ երեք միլիոն մարդ, ողջ ազգը Ձեզ է սպասում, ինչո՞ւ հանգուցալուծում չեք կարողանում գտնել Գյումրիում։
– Ինձ չեն սպասում, ես իմն ասել եմ, դուք ուրիշ տեղ պիտի զանգեք, ինձ պետք չի, ես իմս ասել եմ, սիրուն սպասում եմ։ Մենք էլ ենք սպասում ազգի հետ։
– Իսկ բանակցություններ, քննարկումներ, շփումներ կա՞ն ձեր միջեւ, ի վերջո, հանուն պետության, բոլոր կողմերը, չէ՞, պետք է քայլ անեն։
– Մեր մեջ չկան, բայց մարդիկ կան, որ խոսում, բան են անում իրենց հետ՝ ինձ հետ կապված։
– Այսինքն՝ ձեր միջեւ այնպիսի անհաղթահարելի պատնեշ կա, որ միջնորդավորվա՞ծ եք խոսում։
– Ես իմ խոսքն ասել եմ, ու վերջ, սպասում եմ։
– Իսկ չե՞ք կարծում, որ շատ կոշտ եք ասել, ասել եք՝ եկեք ինձ դարձրեք քաղաքապետ, եւ փոխքաղաքապետերի ու քաղաքապետի պաշտոն չակնկալեք։
– Ես շատ փափուկ եմ ասել, երկու փոխքաղաքապետ կա, առաջինը չենք տալիս, եթե երկրորդն ուզում են, տալիս ենք, բաժին են ուզում, տալիս ենք, ինչ ասես՝ ասել ենք։
– Ասուլիսին կարծեմ ասում էիք, որ երկու փոխքաղաքապետերի պաշտոնն էլ պահում եք ձեզ․․․
– Ոչ, առաջին փոխքաղաքապետի մասին է խոսքը, որովհետեւ դա ոնց որ քաղաքապետը տաս իրենց, էլի եմ ասում՝ մնացած փոխքաղաքապետերը տալիս ենք, բաժինները` որն ուզեն, տալիս ենք։
– Իսկ ի՞նչ են ուզում, միջնորդավորված բանակցություններն ինչի՞ շուրջ են՝ քաղաքապետի՞, առաջին տեղակալի՞, թե՞ բոլորովին այլ բանի։
– Հիմի դու ծիխարի ինձ խոսեցնում ես, սպասի՝ տեսնենք ինչ է լինում, մարդիկ ինչ կպատասխանեն, նոր ․․․
– Դուք չե՞ք վստահում ընդդիմադիր գործընկերներին, որ առաջին տեղակալի պաշտոնը չեք պատրաստվում զիջել։
– Դուք ուղղակի չգիտեք, չեք պատկերացնում երեւի։
– Պատկերացնում եմ, կարծում եք` Ձեզ հնարավոր է կալանավորեն․․․
– Այո, եթե ինձ հետ բան է լինում, փոխքաղաքապետը դառնում է քաղաքապետ։
– Ես էլ էի դա ասում։
– Դե, դրա համար առաջին տեղակալը չենք տալիս, մնացածն ինչ ուզում են, տալիս ենք։
– Այսինքն՝ չե՞ք վստահում, որ եթե Ձեզ կալանավորեն, մեկ այլ ուժից նշանակված առաջին տեղակալը կարող է շեղվել ընդդիմադիր գծից: Ո՞րն է խնդիրը, եթե մի քանի ուժ միավորվում է, որ քաղաքապետ ընտրի, պիտի համարժեք զիջումներ էլ լինեն, չէ՞։
– Ո՞ր թիմերին վստահեմ, ես իմ թիմին պիտի վստահեմ` իմ թիմին: Ես ոչ մեկին չեմ վստահում, իհարկե, պիտի չվստահեմ, ես ո՞նց կարող եմ վստահել այլ թեկնածուի կամ թիմին, դու ուրիշի թիմին կվստահե՞ս։
– Եթե կա ազնիվ համագործակցություն, ուրեմն պիտի լինի նաեւ վստահություն, ի վերջո՝ մենակ չեք կարող, չէ՞, քաղաքը կառավարել։ Ձեր ընդդիմադիր գործընկերներն էլ կարող են ասել՝ մենք էլ ձեզ չենք վստահում, ի դեպ, արդեն ասողներ կան։
– Է, թող չվստահեն, եթե հեչ բան չեղավ, թող գնա նոր ընտրությունների, կտեսնենք, թե ինչ կլինի։ Էլ չեմ ուզում խոսել, կամաց-կամաց խոսեցնելով` խոսք ես քաշում․․․
Բաց մի թողեք
«Սարիկ ջան, լա՞վ ես, ասեմ, իմանաս, եղբայրս, շների անեծքն էր»
Արցախցիների բնակարանային ապահովման ծրագիրը անդադար փոխվում է
Դատապարտյալներ կան տեղափոխվել են այլ ՔԿՀ-ներ, ոմանք` «ԱԱԾ մեկուսարան». Գալյանը նոր պատերազմ է հայտարարել