ԱՄՆ նախագահ Դոնալդ Թրամփը հայտարարել է, որ ԱՄՆ դուրս կգա բանակցությունից, եթե կողմերից մեկը շարունակի խոչընդոտել հրադադարի հասնելու գործընթացին: Խոսքը ուկրաինական պատերազմի մասին է:
Թրամփը չի նշել, թե ով է այդ կողմը, որը կարող է խոչընդոտել կամ խոչընդոտում է: Բայց պետք է ենթադրել՝ դատելով Թրամփի և նրա թիմի այլ անդամների հայտարարություններից, որ այդ կողմը Ուկրաինայի իշխանությունն է:
Կիևի համար ընդունելի չեն այն պայմանները, որ ԱՄՆ բանակցում է Ռուսաստանի հետ: Ուկրաինայի իշխանության «թիկունքին», սակայն, Եվրոպայի դիրքորոշումն է, որը ևս դժգոհ է, որ լիարժեք ներգրավված չէ ԱՄՆ-ՌԴ բանակցությանը:
Նախօրեին Թրամփի ադմինիստրացիայի դիվանագիտական թիմի երկու առանցքային անդամներ՝ պետքարտուղար Ռուբիոն և Մերձավոր Արևելքի հարցերի հատուկ բանագնաց Ուիթկոֆն այցելել էին Փարիզ, որտեղ հանդիպում են ունեցել Ֆրանսիայի նախագահի և արտգործնախարարի հետ:
Այդ հանդիպումից հետո Ֆրանսիայի նախագահ Մակրոնը հայտարարել էր, որ, այդ թվում Մեծ Բրիտանիայի ու Գերմանիայի ներկայացուցիչների մասնակցությամբ դրական քննարկումներ են ունեցել Ելիսեյան պալատում: Նա հայտարարել է, որ հենց սկզբից իրենք աջակցում են խաղաղության հասնելու ԱՄՆ նախագահի ջանքին և պատրաստակամ են սերտ գործակցել ԱՄՆ հետ: Միաժամանակ նա նշել էր, որ Ելիսեյան պալատում քննարկումներից առաջ և հետո խոսել է նաև Զելենսկու հետ՝ կոորդինացիան ապահովելու համար:
Ըստ Մակրոնի՝ քննարկումները գալիք շաբաթ կշարունակվեն Լոնդոնում: Ի՞նչ է սա նշանակում: Թրամփը Ֆրանսիային բերել է իր մոտեցումների դաշտ, և մնացել է այժմ Մեծ Բրիտանիա՞ն, թե՞ Մակրոնի հայտարարությունները դիվանագիտություն են, իսկ իրականում Եվրամիությունն ու Բրիտանիան շարունակում են դիմադրել ռուս-ամերիկյան գործարքին, քանի դեռ չեն ստացել իրենց մասնակցության լիարժեք բավարարում:
Միարժեք ասել, իհարկե, դժվար է, սակայն բավականին նկատելի է, որ Թրամփի հայտարարությունն ունի վերջնագրային տոն՝ եթե չհամաձայնեն, ԱՄՆ դուրս կգա բանակցությունից: Սա կարող է նշանակել, որ ԱՄՆ պատերազմի բեռը կարող է թողնել Եվրոպայի վրա:
Թրամփը չի արձագանքել լրագրողների հարցին, թե արդյոք բանակցությունից դուրս գալու դեպքում ԱՄՆ կշարունակի ռազմական օգնությունն Ուկրաինային: Սա, իհարկե, էական հարցն է:
Այսինքն՝ Թրամփը դուրս գալով բանակցությունից, կմնա՞ պատերազմի մեջ, թե՞ դուրս կգա նաև պատերազմից: Իհարկե, երկու դեպքում էլ իրավիճակի զարգացումն Ուկրաինայում կմտնի էապես նոր փուլ, բայց լիովին տարբեր տրամաբանություններով:
Բաց մի թողեք
Մելոնին բռնության պոռթկումները չի համարում միանգամյա դեպքեր․ Իտալիայից սկսվում է բողոքի ցույցերը խստացնելու օրենքների ընդունումը
Եվրոպական դաշնակիցները «հիասթափված» են Մեծ Բրիտանիայի պաշտպանական կաթվածահարությունից
Ընդհանուր հիմքեր Չինաստանի հարցում. Վաշինգտոնը հակադարձում է ԵՄ-ի տեխնոլոգիական ինքնավարության ձգտմանը