«Ուրախ գերեզմանափորները» գործընթացն ավարտին են տանում․ Աբովյան

Գոյություն ունի մի այսպիսի համակարգչային խաղ` «Ուրախ գերեզմանափորը» անվանումով, որը մեծ հաշվով մարմնավորում է այն ամենը, ինչ մեզ պատրաստել են ԱՄՆ-ի, Ադրբեջանի և Հայաստանի ղեկավարները:

Ինչու հիշեցի այս համեմատությունը: Ինչպես հայտնի է դարձել, ամերիկացիները նախապատրաստում են բարձր մակարդակի հանդիպում, որտեղ, ըստ մամուլի հրապարակումների, պետք է արձանագրվի «խաղաղության» ձեռքբերում` Հայաստանի և Ադրբեջանի միջև։

Բնականաբար, ամեն ինչ ԱՄՆ -ի «անհանգիստ» նախագահ Դոնի Թրամփի հովանու ներքո։ Նախատեսվում է կամ հայտարարություն կամ ինչ-որ փաստաթղթի ստորագրում, որը կարձանագրի Հայաստանի և Ադրբեջանի համատեղ «խաղաղության» ձգտումը։

Հասկանալի է , որ ոչ մի «խաղաղության» հետ էլ այդ գործընթացը կապ չունի և եթե հանդիպումը կայանա, ապա մենք ականատես կլինենք ևս մեկ ակցիայի, որը նման կլինի Հայաստանի «Ուրախ հուղարկավորության» հերթական փուլի ակտիվացմանը՝ այս անգամ ամերիկացիների ծափահարությունների և քաջալերող բացականչությունների ներքո։

Այս պարագայում պարզապես հիշենք իրողությունները, այլ ոչ թե այն պատրանքները, որով մեզ «կերակրում» են արդեն տևական ժամանակ իշխանական տեղեկատվական հոսքերը։ Առաջինը՝ չկա խաղաղության մասին որևէ փաստաթուղթ և խաղաղության բանակցություններ, իրականում տեղի է ունենում Հայաստանի տոտալ կապիտուլյացիայի իրավական ձևակերպման գործընթաց, որը Հայաստանի ներկայիս իշխանությունները անվանում են «խաղաղության պայմանագիր»:

Երկրորդ՝ բայց նույնիսկ այդ փաստաթուղթը չի ստորագրվելու, այլ լինելու է ընդամենը Հայաստանի և Ադրբեջանի միջև մտադրությունների մասին արձանագրության հաստատում կամ նախաստորագրում: Ինչու է դա պետք կողմերին:

Թրամփն այս պարագայում երկու հարց է լուծում։ Ամրապնդում է իր՝ որպես խաղաղապահի իմիջը և իրական հարթակ ստեղծում տարածաշրջանից ռուսներին ու իրանցիներին դուրս մղելու համար։ Իսկ Ալիևին պետք է ռուս-ադրբեջանական հակամարտության լույսի ներքո հստակ ցույց տալ , որ իր երկրի վեկտորը փոխվել է, և այժմ Ադրբեջանը «նոր սպիտակ տեր» ունի։

Սակայն Ալիևին, սկզբունքորեն, ոչինչ ստորագրել պետք չէ, նա ամեն ինչ առանց այդ էլ ստանում է հայկական իշխանություններից։ Սա պարզապես Ալիևի կողմից բարեկամական քայլ է լինելու Թրամփի «խաղաղասեր» իմիջը հաստատելու համար։

Իսկ հայկական իշխանության համար այս հակահայկական պերֆորմանսը շատ անհրաժեշտ է գալիք ընտրություններին Հայաստանի «հպարտ քաղաքացիներին» պարզունակ շանտաժի ենթարկելու համար։

Այսինքն, եթե Հայաստանի և Ադրբեջանի միջև թեկուզ ինչ-որ բան ստորագրվի, նույնիսկ զուգարանի թղթի վրա, ապա հայկական իշխանությունը ամուր կբռնի այդ թուղթը և ամիսներ շարունակ խելագարի պես կթափահարի այդ կեղծ թուղթը «հպարտ քաղաքացիների» աչքերի առջև` ամեն անկյունում ղժղժալով, թե իբր խաղաղություն է գալիս, և պետք է ընդամենը վերընտրել իրենց, որ խաղաղության գործընթացը հասցվի ավարտին։

Ահա այսպիսի պատկեր է այժմ և ապագայում մեզ սպասվում: Մի խոսքով «Ուրախ գերեզմանափորները» մեր աչքի առաջ կրկին քաղաքական «մատնոց» են պտտեցնում։

Արման Աբովյան