ՀՀ-ում Իրանի դեսպանատանը բացվել է սգո մատյան

ՀՀ-ում Իրանի դեսպանատանը բացվել է սգո մատյան՝ ի հիշատակ նախօրեին Իրանում ուղղաթիռի վթարից զոհված ԻԻՀ նախագահի, ԱԳ նախարարի և մյուսների: Այս մասին հայտնեցին դեսպանությունից:

Իրենց ցավակցությունները թողնել ցանկացողների համար այն բաց կլինի չորեքշաբթի օրը՝ մայիսի 22-ին, ժամը 10։00-12։30, 15։30-17։30 և հինգշաբթի օրը՝ մայիսի 23-ին, ժամը 10։00-13։00:

Հիշեցնենք, իրանական ԶԼՄ-ները մայիսի 19-ին հաղորդել էին, որ նախագահ Ռայիսիին և երկրի արտգործնախարար Հոսեյն Ամիր Աբդոլլահիանին տեղափոխող ուղղաթիռը կոշտ վայրէջք է կատարել երկրի հյուսիս-արևմուտքում՝ Վերզեգանի շրջանում: Փրկարարները ժամանել էին արտակարգ պատահարի վայր և իրականացնում էին որոնողական աշխատանքներ։ Ցավոք, ավելի ուշ պաշտոնապես հաստատվեց, որ բոլոր ուղևորները, այդ թվում Իրանի նախագահը, զոհվել են:

Հուղարկավորությունը տեղի կունենա վաղը՝ մայիսի 22-ին:

Մայիսի 23-ին՝ հինգշաբթի օրը՝ ժամը 18:30-ին, Երևանի Կապույտ մզկիթի նիստերի դահլիճում տեղի կունենա հոգեհանգստյան արարողություն՝ ի հիշատակ Իրանի Իսլամական Հանրապետության նախագահ Այաթոլլա Սեյեդ Էբրահիմ Ռայիսիի և նրան ուղեկցած պատվիրակության անդամների։

Այս մասին հայտնել են ՀՀ-ում Իրանի դեսպանության մշակույթի կենտրոնից։

Բոլոր ցանկացողները կարող են այցելել Կապույտ մզկիթ՝ հարգանքի տուրք մատուցելու նահատակներին։