ԱՄՆ պետքարտուղարը հակամարտության կարգավորման գործընթացում արձանագրել է Ռուսաստանի «ցանկության բացակայությունը»

Օկուպացված Ղրիմի ողջ տարածքում և Սևաստոպոլ քաղաքում բենզինի ազատ վաճառքը լիովին դադարեցվել է։

Այդ մասին ՏԱՍՍ-ին ասել է «տարածաշրջանի ղեկավար» Աքսիոնովը։ Նա թերակղզու բնակիչներին խնդրել է կայացված որոշմանը «ըմբռնումով մոտենալ» և հավաստիացրել, որ ուժային կառույցները, ճգնաժամային արձագանքման ծառայությունները և քաղաքային տրանսպորտը «վառելիքով ապահովված» են։ Ղրիմում վառելիքի ճգնաժամը շարունակվում է արդեն մի քանի շաբաթ։

Ուկրաինական աղբյուրների տեղեկացվածությամբ՝ Դոնի Ռոստով-Սևաստոպոլ մայրուղին «վերցված է դրոնային վերահսկողության տակ»։ Այդ տեղեկությունը անուղղակի հաստատել են Ղրիմի իշխանությունները՝ արգելելով տեսանկարահանել վառելիք տեղափոխող տրանսպորտային միջոցները։

«Բջջային հեռախոսի հավելվածով նույնիսկ հարազատին ուղարկված տեղեկությունը, որտեղ խոսք կա վառելիք ներկրող տրանսպորտային միջոցի մասին, գնահատվում է իբրև «աջակցություն ահաբեկչությանը», և անձը ենթարկվում է պատասխանատվության»,- ուկրաինական լրատվամիջոցներին պատմել է Սևոստոպոլի մի բնակիչ։

Այս ֆոնին առանձնահատուկ նշանակություն է ստանում ԱՄՆ պետքարտուղար Մարկո Ռուբիոյի գնահատականը, որ Ուկրաինան «ոչ միայն դիմադրում է, այլև հաջող պատերազմ է մղում»։ Այդ մասին նա ասել է Սենատի արտաքին հարաբերությունների կոմիտեում լսումների ժամանակ։

Ուկրաինական կարգավորման վերաբերյալ ԱՄՆ դիրքրոշումը, կարծես, վերանայվում է։ Նախագահ Թրամփը, ինչպես հայտնի է, մշտապես պնդել է, որ գետնի վրա իրավիճակը Ուկրաինայի օգտին չէ, և Կիևը պետք է հրադադարի հաստատմամբ ավելի շահագրգռված լինի։

Ռուսաստանի արտաքին գործերի նախարար Լավրովը իր հերթին ասել է, որ Մոսկվան ուկրաինական կարգավորման բանակցությունների կողմնակից է, բայց «հակառակ կողմից նման ցանկություն չի տեսնում»։

Նախօրեին ՆԱՏՕ-ի գլխավոր քարտուղար Ռյուտեն այցելել է Կիև։ Մեկ ամսից Հյուսիս-ատլանտյան դաշինքը Անկարայում հերթական գագաթաժողովն է գումարում, որին հրավիրվել է նաև Ուկրաինայի նախագահ Զելենսկին։

Ռուս-ուկրաինական պատերազմում «նոր իրավիճակին» զուգահեռ՝ Եվրամիության երկրները արտաքին գործերի նախարարների մակարդակով համաձայնեցրել են ԵՄ-ին Ուկրաինայի անդամակցության բանակցություններ սկսելու հարցը։

Այդ մասին մամուլի ասուլիսի ձեւաչափում հայտարարել է Հունգարիայի վարչապետ Պետեր Մաջյարը։ Նա հիմնավորել է, որ Ուկրաինան Անդրկարպատների հունգար բնակչության իրավունքների վերականգնման օրենսդրական փաթեթ է մշակել։

ՌԻԱ Նովոստիի տեղեկություններով, մինչ այդ Հունգարիայի վարչապետը Եվրահանձնաժողովի հետ բանակցություններ է վարել և հասել 16 միլիարդ եվրոյի ֆինանսական միջոցների ապասառեցման։ Եվրահանձնաժողովը այդ միջոցներին Հունգարիային զրկել էր նախկին վարչապետ Օրբանի «ռուսաստանամետ» դիրքորոշման պատճառով։

Իհարկե, Ուկրաինան դեռևս երկար ճանապարհ ունի անցնելու, որպեսզի անդամակցի Եվրամիությանը։ Ստեղծված ճակատագրական նշանակության իրավիճակում, սակայն, Բրյուսելում ձեռք բերված համաձայնությունը քաղաքական առումով հսկայական նշանակություն ունի։

Ավելի կարևոր է ՆԱՏՕ-ի գագաթաժողովին Ուկրաինայի մասնակցությունը։ Ռուսաստանի համար, երևում է, ստեղծվում է քաղաքական անբարենպաստ միջավայր։ Արտաքին գործերի նախարար Լավրովը «զարմացել» է, որ ԱՄՆ պետքարտուղարը հակամարտության կարգավորման գործընթացում արձանագրել է Ռուսաստանի «ցանկության բացակայությունը»։