Իսրայելական և մի քանի արաբական լրատվամիջոցներ օրերս հայտնել են, որ Իրանը «մեծացնում է բալիստիկ հրթիռների արտադրության ծավալները և իրականացնում տեխնոլոգիական արդիականացման աշխատանքներ»:
Դեկտեմբերի 22 –ին Իսլամական հանրապետության ԱԳՆ պաշտոնական ներկայացուցիչ Բաղային անուղղակի հաստատել է այդ տեղեկությունը: Նա ասել է, որ այդ «սպառազինությունը նախատեսված է բացառապես ինքնապաշտպանության և զսպման համար»: Իրանցի դիվանագետն այդուհանդերձ հավելել է, որ երկրի «հրթիռային ծրագիրը քննարկման թեմա չէ»:
Ավելի վաղ Իրանի նախագահ Փեզեշքիանը քննադատել է Միացյալ Նահանգներին, որ «հետևողականորեն զինում է Իսրայելին, բայց խոսում խաղաղության մասին»: Իրանի նախագահն ասել է, որ «անիմաստ է պահանջել մի կողմի զինաթափումը, երբ մյուսը կարող է հայտնվել և երկրի երեսից ջնջել մեզ»:
Իսրայելական ynet-ի ռազմական փորձագետի գնահատմամբ՝ այդ հայտարարությունից հետևում է, որ «Իրանը նախապատրաստվում է կանխարգելիչ հարվածներ հասցնել»:
Իրանական «Ֆարս» գործակալությունը հերքել է տեղեկությունները, որ Թեհրանը «նորագույն հրթիռների փորձարկումներ է անցկացնում», իսկ տարածված տեսանյութերն անվանել «կեղծ»: Լրատվամիջոցի մեկնաբանությամբ, «ցուցադրված կադրերը պատկերում են քաղաքացիական ինքնաթիռի օդում թողած հետքը»:
Իսրայելական աղբյուրները հայտնում են, որ վարչապետ Նաթանյահուն առաջիկայում կայցելի Միացյալ Նահանգներ: Ենթադրվում է, որ նա ԱՄՆ նախագահի հետ «կքննարկի նաև Իրանին հրթիռային հարվածներ հասցնելու հնարավորությունը»:
Այս համատեքստում աչքի է զարնում Իրանի արտաքին գործերի նախարար Արաղչիի այցը նախ Բաքու, ապա՝ Մոսկվա: Առաջին դեպքում իրանցի դիվանագետը խոսել է երկկողմ հարաբերությունները ռազմավարական գործընկերության մակարդակի բարձրացնելու երկկողմ նպատակադրվածության մասին:
Երկրորդ այցի իմաստը բացահայտել է ՌԴ արտգործնախարար Լավրովը: Նա լրագրողներին ասել է, որ «սխալ է տպավորությունը, թե ԱՄՆ հետ հարաբերությունները կարգավորելուց հետո Ռուսաստանը կլքի Իրանին»:
ԱՊՀ առաջնորդների ոչ պաշտոնական հանդիպմանն Ադրբեջանի նախագահ Իլհամ Ալիևը չի մասնակցել: Նրա աշխատակազմից մեկնաբանել են, որ «նախագահի աշխատանքային ժամանակացույցը շատ խիտ է»: Նույն օրը Բաքու է գործուղվել Թուրքիայի փոխնախագահ Յըլմազը: Պաշտոնական հաղորդագրության համաձայն՝ նա պետք է մասնակցի տնտեսական համագործակցության միջկառավարական նիստին:
Թուրքիան և Իսրայելը Մերձավոր Արևելքում ազդեցության տարածման հարցում մտել են մրցակցության նոր փուլ: Թուրքիան և Իրանը վերջերս տրանսպորտային հաղորդակցության մասին համաձայնագիր են ստորագրել՝ Թուրքմենստանի մասնակցությամբ:
Չնայած Իրանի հետ պատմա-քաղաքակրթական տարաձայնություններին, Անկարան վերջին շրջանում Թեհրանի հետ հարաբերություններում որոշակի նախաձեռնողականություն է ցուցաբերում: Իրանի դեմ Իսրայելի հրթիռային հարձակումը հղի է տարածաշրջանային պատերազմի սպառնալիքով:
Ըստ տեղեկությունների, Իսրայելը «խիստ նախազգուշացրել է Իրաքի իշխանություններին, որպեսզի զսպեն երկրի տարածքում շիադավան զինված խմբավորումներին, որ վայելում են Իրանի աջակցությունը»:
Բաց մի թողեք
Գերմանիայում Ադրբեջանի քաղաքացու կողմից պետական հանցանք է կատարվել, արդյոք «ահաբեկիչներ են գործում»
Լիբիական ինքնաթիռի «հարձակմամբ սարքել են Թուրքիայի գլխին»
Թրամփի կենտրոնաասիական «ցատկը» Ուկրաինայի շուրջ ռուս-ամերիկյան ենթադրյալ «գործարքի մաս է»