Ազգային ժողովի նախագահ Ալեն Սիմոնյանը շնորհավորել է Ազգային ժողովրդավարության ինստիտուտի խորհրդարանական պրակտիկայի և ֆելլոուշիփի ծրագրի 2023 թվականի շրջանավարտներին:
«Վստահ եմ՝ այն գիտելիքներն ու փորձը, որ ձեռք եք բերել այս ամիսների ընթացքում Ազգային ժողովում՝ միայն սկիզբն են նոր ձեռքբերումների և հաջողությունների»,- նշել է Սիմոնյանը։
Խորհրդարանի նախագահը բարձր է գնահատել ծրագրի մասնակիցների ներգրավվածությունն ԱԺ աշխատանքներում և շնորհակալություն հայտնել Ազգային ժողովրդավարության ինստիտուտին ու ԱՄՆ Միջազգային զարգացման գործակալությանն արդեն հինգերորդ անգամ ծրագիրն իրականացնելու և հայ երիտասարդներին օրենսդիր մարմնի աշխատանքներին մասնակցության հնարավորություն ընձեռելու համար:
Ծրագրի շրջանավարտներին շնորհավորել են նաև ԱՄՆ ՄԶԳ հայաստանյան առաքելության տնօրեն Ջոն Ալլելոն, Ազգային ժողովրդավարության ինստիտուտի հայաստանյան գրասենյակի տնօրեն Քոեն Պուստյենսը, Ազգային ժողովրդավարության ինստիտուտի հայաստանյան գրասենյակի խորհրդանական ծրագրերի ավագ ղեկավար Հովհաննես Հարությունյանը: Ծրագրի շրջանակում շուրջ տասն ամիս երիտասարդ մասնագետները հնարավորություն են ստացել փորձնակություն անցնել խորհրդարանում՝ մասնակցելով օրենսդիր մարմնի աշխատանքներին:
Փորձնակներն աջակցել են հանձնաժողովներին, պատգամավորներին ու ԱԺ աշխատակազմին՝ իրականացնելով վերլուծություններ, հետազոտություններ, մամուլի մշտադիտարկում, մամուլի հաղորդագրություններ, օգնել կառավարել սոցիալական հարթակները, ինչպես նաև մասնակցել հանձնաժողովների և ԱԺ լիագումար նիստերին: Նրանք մասնակցել են նաև համայնքային հանդիպումների կազմակերպչական աշխատանքներին:
Ծրագրի արդյունքում երիտասարդ մասնագետները բարելավել են իրենց գիտելիքներն ու հմտությունները, շրջանավարտներից շատերն անցել են պետական կառավարման մարմիններում աշխատանքի: Ծրագիրը ֆինանսավորվում է ԱՄՆ Միջազգային զարգացման գործակալության (USAID) կողմից և իրականացվում է Ազգային ժողովրդավարության ինստիտուտի (NDI) ու Ազգային ժողովի համագործակցության արդյունքում:
Բաց մի թողեք
Պատմության ինստիտուտը 3 էջանոց հայտարարություն է տարածել 8-րդ դասարանի «Հայոց պատմություն» դասագրքի վերաբերյալ
Հրապարակվել է Հայաստանի և Ադրբեջանի միջև սահմանազատման հանձնաժողովների համատեղ գործունեության կանոկակարգը
Ահազանգ․ անհայտ անձինք զանգահարում են ծնողներին, ներկայանում որպես դպրոցի աշխատակից