Crocus City Hall-ի ահաբեկչությունից հետո պատահաբար այնտեղ հայտնված և մարդկանց փրկած 35-ամյա Կարեն Ենգիբարյանը մահացել է

Crocus City Hall-ի ահաբեկչությունից հետո շենքի ներսում գտնվողներին օգնության ձեռք մեկնած 35-ամյա Կարեն Ենգիբարյանը մահացել է, հայտնել է «Mash» տելեգրամյան ալիքը։

Տղամարդն ամբողջ գիշեր մասնակցել է ծխի գոտուց մարդկանց դուրս բերելու աշխատանքներին։ Նա իր բաճկոնը տվել է տուժածներից մեկին։

Ըստ տեղեկության՝ Կարենը ներշնչել է ածխածնի օքսիդը, ինչի հետևանքով թոքերի սուր վարակ է զարգացել:

Ենգիբարյանը մի քանի օր բուժում է ստացել, սակայն նրա կյանքը փրկել չի հաջողվել։

Մահացածն աշխատում էր արտաքին գովազդ տեղադրող ընկերությունում։ Ողբերգության օրը նա պատահաբար հայտնվել է Crocus City Hall-ի մոտ և անմիջապես շտապել է օգնել տուժածներին։

35-ամյա Ենգիբարյանն ամուսնացած էր:

Մոսկվայի Crocus City Hall-ի ահաբեկչությունից տուժածներից մեկը, որը հրազենային ծանր վնասվածքներ էր ստացել, հիվանդանոցում մահացել է:

Այս մասին հայտնել է ՌԴ առողջապահության նախարար Միխայիլ Մուրաշկոն՝ նշելով, որ տուժածը գտնվել է ծայրահեղ ծանր վիճակում։

Ահաբեկչության զոհերի թիվը հասել է 144-ի։