14/04/2024

Ալիևի ռեժիմը ցանկանում է հարձակվել Հայաստանի վրա, որպեսզի խանգարի Փաշինյանի հանդիպումը Բլինքենի և ֆոն դեր Լայենի հետ

Ալիևի ռեժիմը և նրա դաշնակիցները ցանկանում են հարձակվել Հայաստանի վրա՝ փորձելով խափանել հանրապետության վարչապետ Նիկոլ Փաշինյանի հանդիպումը ԱՄՆ պետքարտուղար Էնթոնի Բլինքենի և Եվրահանձնաժողովի ղեկավար Ուրսուլա ֆոն դեր Լայենի հետ։

Այս մասին «X»-ի իր միկրոբլոգում գրել է Բելգիայում Հայաստանի արտակարգ և լիազոր դեսպան, ԵՄ-ում Հայաստանի մշտական ներկայացուցիչ Տիգրան Բալայանը՝ նշելով, որ ապրիլի 5-ին նախատեսված հանդիպումը ուղղված է լինելու Հայաստանի զարգացմանն ու կայունությանը:

Հիշեցնենք, որ Հայաստանում ԵՄ առաքելությունը հայտարարություն է տարածել, որում նշվում է, որ հայ-ադրբեջանական սահմանին «արտառոց տեղաշարժ» չի նկատվել։

Հայաստանում ԵՄ առաքելության հայտարարությանը արձագանքել են նաև Վրաստանի և Հարավային Կովկասի ճգնաժամի հարցերով ԵՄ հատուկ ներկայացուցիչ Տոյվո Կլաարը և Հայաստանում Ֆրանսիայի դեսպան Օլիվյե Դեկոտինին։

Ավելի վաղ ՀՀ ՊՆ-ն հերքել էր Ադրբեջանի այն ապատեղեկատվությունը, թե իբր ՀՀ զինված ուժերը սահմանի տարբեր ուղղություններով իրականացնում են անձնակազմի, զրահատեխնիկայի, հրետանու և այլ կրակային զինատեսակների կուտակումներ և ակտիվ տեղաշարժեր։