ՏԻՄ ընտրություններից հետո Թուրքիայի մի շարք խոշոր քաղաքներում զանգվածային անկարգություններ են սկսվել

Թուրքիայի մի շարք քաղաքներում զանգվածային բողոքի ցույցեր են տեղի ունեցել, որոնք ուղեկցվել են կրակոցներով, փողոցներում անվադողերի այրմամբ։ Այս մասին հայտնում է Shot տելեգրամյան ալիքը։

Զանգվածային ցույցեր են սկսվել առնվազն վեց խոշոր քաղաքներում՝ Վանի նահանգային ընտրական հանձնաժողովի՝ քրդամետ DEM-ի թեկնածու Աբդուլլահ Զեյդանին ընտրություններից որակազրկելու որոշումից հետո։ Մինչ այդ նա հաղթել էր, սակայն մանդատը տրվել է Թուրքիայի նախագահ Ռեջեփ Թայիփ Էրդողանի կուսակցության թեկնածուին։

Լարված իրավիճակի պատճառով տեղական իշխանությունները ապրիլի 3-ից ապրիլի 17-ը արգելել են զանգվածային հավաքները։ Միաժամանակ Քրդստանի աշխատավորական կուսակցությանը մոտ կանգնած սոցիալական ցանցերն ու լրատվամիջոցները բնակիչներին կոչ են անում դուրս գալ փողոց։

Ինչպես հայտնում է Shot-ը, տասնյակ մարդիկ ծեծկռտուք են սկսել ոստիկանների հետ՝ փողոցներում ավտոմատներից կրակելով, անվադողեր հրկիզելով և մոլոտովի կոկտեյլներ նետելով իրավապահների վրա։

Մինչ այս, իշխող «Արդարություն և զարգացում» կուսակցության պաշտոնական ներկայացուցիչ Օմեր Չելիքը հայտարարել էր, որ թուրքական իշխանությունները չեն նախատեսում տեղական ինքնակառավարման մարմինների ընտրությունների արդյունքներից հետո հայտարարել արտահերթ համընդհանուր և նախագահական ընտրությունների մասին, որին ներկա նախագահի կուսակցությունը 2013 թվականին պարտություն կրեց:

Թուրքիայում մարտի 31-ին տեղի էին ունեցել տեղական ինքնակառավարման մարմինների ընտրություններ։ Դրանց արդյունքների համաձայն՝ Էրդողանի կուսակցությունը պարտություն է կրել խոշոր և կարևոր քաղաքներում:

Արդյունքում Անկարայի և Ստամբուլի ներկայիս քաղաքապետեր՝ ընդդիմադիրներից Մանսուր Յավասն ու Էքրեմ Իմամօղլուն պահպանել են իրենց պաշտոնները։ Ընդդիմադիր Ժողովրդահանրապետական կուսակցությունը (CHP) հաղթանակ է տարել երկրի շատ այլ շրջաններում։