Հունիսի 17-ին ՀՀ պաշտպանության նախարար Սուրեն Պապիկյանի գլխավորած պատվիրակությունն աշխատանքային այցով մեկնել է Ֆրանսիա:
Այս մասին հայտնել են նախարարությունից։ Պաշտպանության նախարարը Ֆրանսիայում կմասնակցի ռազմական ցուցահանդեսի, որի շրջանակում նաեւ սպասվում է հայ-ֆրանսիական ֆորում՝ պաշտպանական գործակցության հեռանկարների վերաբերյալ: Ըստ նախնական տեղեկության, ֆորումին կարող են մասնակցելլ ֆրանսիական ռազմաարդյունաբերական ձեռնարկությունների ներկայացուցիչներ:
Կկայանա ֆորումը, եւ ինչ ներկայացուցչականություն կունենա այն, պարզ կլինի առաջիկայում, սակայն անկասկած է այն, որ հայ-ֆրանսիական պաշտպանական գործակցության որակական եւ բովանդակային համապարփակ արդյունավետությունը պետք է ենթադրի ոչ միայն մատակարարումներ, այլ նաեւ թերեւս համատեղ արտադրության ծրագրեր:
Դա հատկապես կարեւոր է ելնելով Հայաստանի աշխարհագրական դիրքից եւ Հայաստանի ու Ֆրանսիայի միջեւ լոգիստիկ բավականին բարդ շղթայից, որը կարող է պարունակել բազմաթիվ աշխարհաքաղաքական նրբերանգներ եւ ըստ այդմ՝ անկանխատեսելիություն:
Հետեւաբար, Հայաստանի հետ պաշտպանական գործակցության ցանկացած խորքային իրողություն պետք է պարունակի ռազմարդյունաբերության բաղադրիչ՝ համատեղ արտադրության, Հայաստանի արդյունաբերական կարողության ընդլայնման առումով: Մեծ հաշվով հենց սա է, որ հատկապես ելնելով ժամանակակից իրողություններից, որակապես տարբերելու է որեւէ պաշտպանական գործակցություն եւ առավել եւս ռազմա-քաղաքական հարաբերություն:
Հակառակ պարագայում, պարզապես մատակարարումների եւ այդ հարցում այսպես ասած բարեխղճության վրա հիմնվար հարաբերությունը ժամանակակից, անկանխատեսելի եւ անորոշ աշխարհաքաղաքական միջավայրում այլեւս չի կարող լինել պաշտպանական գործակցության հուսալի որակ: Այդ իմաստով, հայ-ֆրանսիական պաշտպանական գործակցության ներուժը պետք է չափել թերեւս հենց համատեղ արտադրողականությանն առնչվող ծրագրերի առկայությամբ եւ առարկայականությամբ:
Բաց մի թողեք
Կոչեր Ադրբեջանին, միջազգային հանրությանը. Ցեղասպանագետների միջազգային ընկերակցությունը ԼՂ-ի վերաբերյալ բանաձև է ընդունել
ԵԽ արդարադատության նախարարները Ուկրաինային առնչվող հռչակագիր են ընդունել. Հայաստանը չի միացել
Հայաստանում որևէ մեկը զբաղվո՞ւմ է տեղեկատվա-քարոզչական անվտանգության հարցերով