Նոյեմբերին կայանալիք Կլիմայի գագաթնաժողովին պատրաստվող Ադրբեջանը ինտենսիվ միջազգային միջոցառումների կազմակերպմամբ փորձում է կերտել «կանաչ Ադրբեջանի» իմիջ: Հերթական միջոցառման շրջանակում հարցազրույց տալով Եվրանյուզ հեռուստաընկերությանը, Իլհամ Ալիեւը հայտարարել է, որ նավթ ու գազ արդյունահանողի վարկ ունեցող Ադրբեջանը այժմ դառնում է վերականգնվող, կանաչ էներգետիկայի ներդրումային գրավիչ միջավայր:
«Կանաչը» սակայն Ադրբեջանի համար այլ բան չէ, քան պարզապես նավթագազային իմիջի այսպես ասած նոր փաթեթավորում, կամուֆլյաժ, որի շնորհիվ Բաքուն թերեւս փորձելու է կերտել նոր իմիջ:
Պետք է նկատել, որ մտածողության վեկտորի առումով Ալիեւը բավականին ադեկվատ ու համարժեք է ժամանակակից իրողություններին: Այլ կերպ ասած՝ թշնամուն կամ հակառակորդին թերագնահատել պետք չէ բոլորովին: Ավելին, մեզ հետ վերջին տարիներին տեղի ունեցած իրադարձությունները գուցե այլ ընթացք ունենային, կամ ընդհանրապես տեղի չունենային, եթե մեզանում չլիներ այդ համատարած թերագնահատումն ու վերամբարձ ինքնագոհությունը: Որեւէ հակառակորդի, թշնամու, մրցակցի հանդեպ հաջողության առանցքային գրավականներից, առանցքային նախադրյալներից մեկը նրան չթերագնահատելն է:
Հետեւաբար, պետք չէ թերագնահատել նաեւ Ադրբեջանի «կանաչ» հնարքը: Օրինակ, երբ 2022 թվականի դեկտեմբերին Իլհամ Ալիեւը Լաչինի միջանցքի արգելլափակման եւ փաստորեն Արցախի դեմ էթնիկ զտման եզրափակիչ փուլի մեկնարկ տվեց «բնապահպանական» առիթով եւ մոտիվով, դա պարզապես խնդրի լուծման տեխնոլոգիայի ընտրություն չէր: Բաքուն ստեղծում էր նախադեպ:
Երբ, օրինակ նախորդ տարի այս ժամանակահատվածում Ադրբեջանի մի քանի տասնյակ այսպես կոչված հասարակական-բնապահպանական կառույցներ ռեգիոնալ էկոլոգիայի համար իբրեւ թե մտահոգությամբ նամակ են հղում Հայաստանի վարչապետին, դրանով ստեղծում են պարզապես նախադեպ:
Այդ նախադեպերը հուշում են, որ «կանաչ» դիրքավորումը Ադրբեջանի համար պարզապես համաշխարհային նոր իմիջի հարց չէ, այլ Հայաստանի հանդեպ նոր հավակնությունների «պատվանդան», որ կառուցվելու է ադրբեջանական սեւի՝ նավթի վրա:
Բաց մի թողեք
Ալիևի անհավատալի արկածներն Իտալիայում՝ ոչ միայն որպես Ադրբեջանի նախագահ, այլև՝ ՌԴ նախագահի «լիազոր ներկայացուցիչ»
Մոսկվան Ադրբեջանի եւ Թուրքիայի հետ որեւէ «ոչ պակաս ընդգրկուն» պայմանավորվածությամբ չի հարվածի «թիկունքից»
«Դիմադրության» շարժման «սրբազան» շարունակությունը․ առաջիկա հավաքին իրական շահառուները դուրս կգա՞ն «փարդի հետևից»