Սյունիքի մարզի Տոլորոս գյուղում հրդեհ է բռնկվել անասնագոմում․ կենդանիներն անկել են․ Լուսանկար

Այսօր՝ օգոստոսի 9-ին, խոշոր հրդեհ է տեղի ունեցել Սյունիքի մարզում:

Ժամը 00:25-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Սիսիան խոշորացված համայնքի Տոլորոս գյուղի վերջնամասում գտնվող անասնագոմի մոտ խոտածածկ տարածք է այրվում, որը հնարավոր է հասնի անասնագոմին:

Մինչ հրշեջների ժամանումը կրակի տարածման դեմ պայաքրել են անասնագոմի սեփականատեր Վահրամ Գ.-ն և գյուղացիները:

Հրդեհի հետևանքով տուժածներ չկան: Պարզվել է, որ կրակը բռնկվել է նաև անասնագոմում, որն ամբողջությամբ այրվել է: Ներսում այրվել է 2500 հակ անասնակեր, իսկ անասնագոմին կից 1000 հակ, անասնագոմի ներսում ծխահարվել ու անկել է 8 ցուլ և 16 հորթ:

Հրշեջ-փրկարարները կանխել են հրդեհի տարածումը դեպի մոտակա տներ:

Աղբյուրի փոխանցմամբ՝ հրդեհաշիջման աշխատանքները դեռ շարունակվում են։