«Քաղպայմանագիր» կուսակցության անդամներն ու նախագահը մոռանում են, որ իրենց բոլոր խոստումները, ելույթները ․․․

Որ Նիկոլ Փաշինյանն իշխանության գալուց հետո դրժել է նախկինում տված գրեթե բոլոր խոստումները, դրանում արդեն բոլորն են համոզվել:

Հրապարակ թերթը գրել է․ Որպես խմբագիր եւ որպես ընդդիմադիր՝ նա մի բան էր ասում, վարչապետի պաշտոնում ասել ու արել է տրամագծորեն հակառակը: Եվ դրա մասին բազում օրինակներ կան: Ամենավառ օրինակներից մեկը Փաշինյանի եւ նրա թիմի կողմից հանրության շրջանում թեւավոր դարձած «Սաշիկի արագաչափերից» հրաժարվելու խոստումն էր։

2018-ի իշխանափոխության օրերին Գյումրից Երեւան քայլերթի ժամանակ Փաշինյանն ու իր թիմակիցները «սկոչ» էին փակցնում, ներքնաշորեր կապում արագաչափերի վրա, իսկ այսօրվա վարչապետը «սերդեչնի պրիվետ» էր հղում Զիմզիմովին` Սաշիկ Սարգսյանին, հանրության գիտակցության մեջ ամրագրելով այն, որ արագաչափերի գումարները տնօրինում է անձամբ Սերժ Սարգսյանը` եղբոր հետ միասին: Վարչապետ դառնալուն պես Փաշինյանն արագաչափերը ոչ միայն պահելու որոշում կայացրեց, այլեւ տարեցտարի դրանց թիվն ավելացրին՝ սերժսարգսյանական հիմնավորմամբ, թե դրանք նպաստում են ավտոճանապարհային պատահարների թվի եւ ճանապարհային երթեւեկության կանոնների խախտումների դեմ պայքարին։ Մինչդեռ վիճակագրությունը հակառակն է փաստում․ ներքին գործերի նախարարությունը մեր հարցմանն ի պատասխան ներկայացրել է 2018 եւ 2023 թվականների ճանապարհային տրանսպորտային պատահարների ցուցանիշները: Այսպես. 2018 թվականին հաշվառվել է 4 հազար 111 ՃՏՊ, որի հետեւանքով զոհվել է 343, մարմնական վնասվածքներ ստացել 5 հազար 950 մարդ, իսկ 2023 թվականին 4 հազար 613 ՃՏՊ է եղել, որի հետեւանքով զոհվել է 378, մարմնական վնասվածքներ ստացել 6 հազար 537 մարդ, 4 հազար 613-ից 314-ը եղել է մահվան ելքով։

2018-ի ընթացքում վարչական տույժ նշանակելու մասին 1.644.502 որոշում է կայացվել, որոնցով նշանակված տուգանքների գումարը կազմում է 13 մլրդ 168 մլն-ից ավելի դրամ, եւ գանձվել է 9 միլիարդ 592 միլիոն 635 հազար 207 ՀՀ դրամ: Իսկ 2023-ի ընթացքում վարչական տույժ նշանակելու մասին 1.958.863 որոշում է կայացվել, որոնցով նշանակված տուգանքների գումարը կազմում է 13 մլրդ 817 մլն-ից ավելի դրամ, բայց, չգիտես ինչու, գանձվել է 17 միլիարդ 738 միլիոն 064 հազար 557 ՀՀ դրամ:

Նույնիսկ եթե հավատանք ստի մեջ վարպետացած պետական կառույցների ներկայացրած վիճակագրությանը, ապա ե՛ւ պատահարների քանակն է աճել, ե՛ւ հատկապես` տուգանքների, չնայած Փաշինյանն ասում էր․ «ՀՀ քաղաքացին տուգանքի մատերիալ չէ»:

Մենք մի շատ ուշագրավ ելույթ հայտնաբերեցինք համացանցում. 2015-ի դեկտեմբերի 21-ին Նիկոլ Փաշինյանը ելույթ էր ունենում խորհրդարանի ամբիոնից եւ Սերժ Սարգսյանին ու ՀՀԿ-ական վարչակարգին դաժան քննադատության ենթարկում, որ արագաչափերի տեղադրումից 3 տարի անց վիճակագրությունը ցույց է տալիս, որ ե՛ւ պատահարների թիվն է ավելացել, ե՛ւ տուժածների, զոհերի, ու իր ելույթում հռետորական հարց էր հնչեցնում, ինքն էլ պատասխանում. «Այսինքն՝ այս ամեն ինչն ի՞նչ է նշանակում։ Սա ընդամենը նոր հարկատեսակ է, որ դրված է Հայաստանի քաղաքացիների ուսերին։ Ուղղակի հարկատեսակ է, որովհետեւ ոչ մի խնդիր չի լուծում, լուծում է ֆիսկալ խնդիր»:

Իսկ Փաշինյանի ներկայացրած վիճակագրությամբ՝ 2011թ. Հայաստանի ավտոճանապարհներին եղել էր ընդամենը 2 հազար 319 ավտովթար, 2014-ին՝ 3 հազար 156: Եվ վարորդներին 2011-ին նշանակվել է մոտ 3 միլիարդի տուգանք, 2014-ին` 13 մլրդ 214 մլն-ի։ Փաշինյանը մի խրոխտ ճառ էր ասում, թե այս միլիարդները ՀՀ քաղաքացիները «պիտի ծախսեին իրենց երեխաների ուսման վարձի, երեխաներին կոշիկ առնելու, հագուստ առնելու, իրենց սոցիալական կարիքները հոգալու համար, տվել են ո՞ւմ՝ չգիտենք ում, տվել են ինչ-որ մի հատ «Սեքյուրիթի Դրիմ» ընկերության, որի  եկամուտների հսկայական բաժինը, ըստ օդում կախված եւ շարունակաբար թեւածող լուրերի, տնօրինում է Սերժ Սարգսյանի ընտանիքը… օդում թեւածող ու կախված լուրերի համաձայն՝ նշվում է կոնկրետ մարդու՝ Սերժ Սարգսյանի եղբոր՝ Ալեքսանդր Սարգսյանի անունը»: 2015 թվականին Նիկոլ Փաշինյանն ասում էր. «Մարդն ուզում է հասկանալ՝ այդ գումարն ինչի՞ համար է վճարում»:

Այսօր կարելի է նույն հարցը տալ նրան` մարդն ինչի՞ համար է այդ միլիարդները վճարում, կարող էր, չէ՞, դրանով իր երեխային ուսման տալ, շոր ու կոշիկ գնել: Ավելին՝ եթե 2015-ին այդ գումարները Սերժ Սարգսյանի եւ իր ընտանիքի գրպանն էին գնում, ապա երկարուձիգ քննության արդյունքում պարզվեց, որ այդպես չէ, եւ «Սեքյուրիթի Դրիմ» կազմակերպությունն էլ դուրս եկավ մեջտեղից, այսօր ավելի լեգիտիմ հարց է ծագում, թե ով է տնօրինում այդ գումարները, ուր են գնում այդ միջոցները: Եթե դա պետական բյուջե է գնում, թերեւս` ամեն օր «դաչաների» վրա ծախսվող 5 հազար դոլարը հենց այդպես է գոյանում ու ծախսվում կառավարական դաչաներում ապրողների, հատկապես Փաշինյանի ընտանիքի վրա, նրանց անվտանգությանն ուղղված ահռելի ծախսերն այդ գումարներից են արվում, գործուղում, հեծանվավազք եւ այլ շռայլություններ` նույնպես: Հակառակ դեպքում, Նիկոլ Փաշինյանը գոնե իր մեկ խոստմանը հավատարիմ կմնար եւ կհաներ նախկինների դրած արագաչափերը:

Վերը նշված ելույթը նա ավարտում է այսպես. «Եվ հիմա ես ուզում եմ ասել, լիազորված եմ ասել, որ մենք վերջերս «Քաղաքացիական պայմանագիր» կուսակցության վարչության նիստում քննարկել ենք այս հարցը եւ եկել ենք միանշանակ եզրակացության։ Մեր կուսակցության դիրքորոշումն է, որ արագաչափերը միանշանակ պետք է հանվեն Հայաստանի ավտոճանապարհներից, եւ այս հարցը մենք դնելու ենք մեր կուսակցության ծրագրային, այդ թվում՝ նախընտրական ծրագրերի հիմքում»:

«Քաղպայմանագիր» կուսակցության անդամներն ու նախագահը մոռանում են, որ իրենց բոլոր խոստումները, ելույթները, ծրագրային դրույթները պահպանվել են գրավոր կամ բանավոր աղբյուրներում` ոչ ոք չի մոռացվել, ոչինչ չի մոռացվել: