Մի քանի օր Սևանա լճում որոնվող տղամարդը զանգահարել ու ասել է, որ ողջ է. նա նշել է՝ շուտով կհայտնի իր քայլի պատճառը

Սեպտեմբերի 9-ին իր ընկերների հետ հեռախոսով կապ է հաստատել Երևանի բնակիչ 43-ամյա Միքայել Ս.-ն և հայտնել, որ իզուր են իրեն մի քանի օր ջրափրկարարները, ջրասուզակներն ու ոստիկանները որոնում, ինքը ողջ է, կգա և ամեն ինչ կասի, թե ինչ է իրականում տեղի ունեցել։

Այս մասին հայտնում է Shamshyan.com-ը՝ հիշեցնելով, որ վերջինիս սեպտեմբերի 5-ից ոստիկանության Մաշտոցի բաժինը որոնում էր որպես անհետ կորածի:

Նրա ընկերներն ու բարեկամները նրան պատկանող «Lexus» մակնիշի ավտոմեքենան հայտնաբերել էին Գեղարքունիքի մարզի Արծվանիստ գյուղի վարչական տարածքում՝ Սևանա լճի ափամերձ անտառում, իսկ նրա հագուստները՝ ավտոմեքենայից մի քանի հարյուր մետր հեռավորության վրա՝ լճի ափին։

Օրեր շարունակ փրկարարները, Սևանի ջրասուզակները, ոստիկանության ծառայողները, գյուղացիները, ինչպես նաև նրա մի քանի ընկերներ որոնողական աշխատանքներ են իրականացրել, որին նաև մասնակցել էին Մարտունու քննչական բաժնի քննիչները։

Տղամարդու անհետանալու փաստով Մարտունու քննչական բաժնում «սպանություն» հատկանիշներով նախաձեռնվել է քրեական վարույթ։

Կայքի տեղեկություններով՝ նա նաև հեռախոսային կապ է հաստատել ոստիկանության Մաշտոցի և Մարտունու բաժինների ղեկավարների հետ ու հայտնել այն, ինչ իր ընկերներին է ասել: