Արթիկում որոշների թողտվությամբ շների դաժան սպանդ է իրականացվել. Մովսես Հարությունյան

«Երեկ Արթիկում որոշների թողտվությամբ շների դաժան սպանդ է իրականացվել»:

Այս մասին հայտնել է ԱԺ նախագահի մամուլի խոսնակ Մովսես Հարությունյանը:

«Օրը ցերեկով բոլորի աչքի առաջ կրակել են անպաշտպան կենդանիների վրա։ Առկա են տեսանյութներ, կան ականատեսներ։

Հուսով եմ, որ մեր իրավապահները համապատասխան իրավական գնահատական կտան` պատժելով անմեղ կենդանիների վրա կրակողին ու նրան քաջալերողներին, ովքեր դուխ են տվել, որ անի այդ քայլը»,- գրել է նա «Ֆեյսբուք»-ի իր էջում։

Հրապարակ թերթը գրել է․ Կրակոցները հնչել են գիշերով: Մեզ ուղարկված արնաշաղախ դիակների կադրերը հնարավոր չէ սառնասրտորեն դիտել։ Դրանք «Հրապարակին» քիչ առաջ ուղարկեց կենդանասերներից Գոհար Տեր- Անտոնյանը։ «Շներից ցանց են սարքել, փամփուշտները տեղ-տեղ դուրս են եկել շների մարմիններից», – ասում է նա։ Մարմինները հայտնաբերել է Արթիկի ավագանու անդամ Ժաննա Ասատրյանը։ Նրա ջանքերով Արթիկում թափառող կենդանիների ստերջացման ծրագիր է իրականացվում, սակայն այս քաղաքում գազանությունը կենդանիների նկատմամբ շարունակվում է։ Այն բանից հետո, երբ դեպքի մասին տեղեկացրել են Արթիկի ոստիկանության պետի տեղակալ Գասպարյանին, շների մարմիններն անհետացել են։

Ըստ Գոհար Տեր-Անտոնյանի, սա պատահական չէր կարող լինել։ «Կրակոցները այնքան շատ են եղել, որ ոստիկանները ուղղակի չէին կարող լսած չլինեին դրանք։ Ամենայն հավանականությամբ, նրանք իմացել են, թե ով է եղել կրակողը, եւ իմ ահազանգից հետո զգուշացրել են, որ հանցագործը շների մարմինները վերացնի։Ոստիկանները կոծկում են հանցագործին, առանց հասկանալու, որ այս նույն զենքով նա վաղը նաեւ մարդկանց է կրակելու», – ասում է Գոհար Տեր- Անտոնյանը։ Նա արդեն մասնագիտացել է կենդանիների հանդեպ դաժան վերաբերմունքի հարցերում։ Նրա ահազանգերով մի քանի վարույթներ կան հարուցված։  Տեր-Անտոնյանի վարկածը հերքում է ՆԳՆ խոսնակ Նարեկ Սարգսյանը։ Նա հայտնեց, որ ոստիկանները գնացել են դեպքի վայր, սակայն շների մարմինները չեն գտել։ «Անհրաժեշտ է հաղորդում ներկայացնել հանցագործության մասին, որին օրինական ընթացք կտրվի», – ասաց Նարեկ Սարգսյանը։

Հ․Գ․ Արթիկում արդեն «բոլոլա» է սկսվել դեպքի շուրջ: Այս կապակցությամբ մի ճշգրտում՝ շների մարմինները գտել է ոչ թե ավագանու անդամ Ժաննա Ասատրյանը, այլ բնակիչները, որոնք ահազանգել են Ժաննա Ասատրյանին: