Ասադը հանձնարարել է խաղաղ ճանապարհով փոխանցել իշխանությունը, Ռուսաստանը բանակցությանը չի մասնակցել. ՌԴ ԱԳՆ

Բաշար ալ-Ասադը Սիրիայում զինված հակամարտության մի շարք մասնակիցների հետ բանակցություններից հետո որոշել է հեռանալ նախագահի պաշտոնից և լքել երկիրը՝ հանձնարարականներ տալով իրականացնել իշխանության փոխանցումը խաղաղ ճանապարհով։

Այս մասին հայտնել է ՌԴ ԱԳՆ-ն։

Ռուսաստանը չի մասնակցել այդ բանակցություններին:

ՌԴ ԱԳՆ-ն կոչ է արել հակամարտությունում ներգրավված բոլոր կողմերին հրաժարվել բռնության կիրառումից և երկրի կառավարման խնդիրները լուծել քաղաքական ճանապարհով։ Այս առումով Ռուսաստանը կապի մեջ է սիրիական ընդդիմության բոլոր խմբերի հետ։

ՌԴ ԱԳՆ-ն նաև կոչ է արել հարգել սիրիական հասարակության բոլոր էթնո-դավանական ուժերի կարծիքը և հույս հայտնել, որ իրավիճակի նկատմամբ նույն մոտեցումը կպահպանվի նաև ՄԱԿ-ի կողմից։

Ավելի վաղ ապստամբները հայտարարել էին երկրի մայրաքաղաք Դամասկոսի գրավման և Ասադի կառավարության տապալման մասին։ Նաև ենթադրվում էր, որ Սիրիայի նախագահ Բաշար ալ-Ասադը կարող էր զոհված լինել ավիավթարի հետևանքով: