Հայաստանում ԵՄ դիտորդական առաքելությունը, պատասխանելով Հայաստանի հանրային հեռուստաընկերության հարցին հայտնել է, որ սահմանային պարեկության ընթացքում հայկական կողմում չեն նկատել որևէ անսովոր շարժ կամ կուտակում:
ԵՄ դիտորդներն այդպես են արձագանքել հարցին, որ վերաբերում է Ադրբեջանի տարածած ապատեղեկատվությանը, թե Հայաստանը կուտակում է ուժեր և պատրաստվում ռազմական գործողության:
Միաժամանակ, ԵՄ դիտորդները նաև հայտնել են, որ ադրբեջանական կողմում էլ չեն նկատել անսովոր շարժ: Այն, որ հայկական կողմը չունի Ադրբեջանի դեմ ռազմական գործողության որևէ մոտիվ, չափազանց պարզ է:
Այդպիսի մոտիվ ունենում է այն կողմը, որն ունի ուժային գերակշռություն: Այսօր ուժային գերակշռություն ունի Ադրբեջանը, և Բաքուն է, որ իր քաղաքական վարքագիծը կառուցում է հենց դրա վրա՝ կիրառելով ուժ կամ ուժի կիրառման սպառնալիքի վրա հիմնված շանտաժ՝ այդ կերպ փորձելով Հայաստանին թելադրել քաղաքական պահանջներ:
Ադրբեջանական տևական պրոպագանդիստական արշավը, թե իբր Հայաստանը պատրաստվում է ռազմական գործողության, հենց այդ շանտաժի տարրերից մեկն է: Ադրբեջանն այդ պրոպագանդիստական արշավով հոգեբանական ճնշում է գործադրում Հայաստանի վրա, հայ հանրության վրա, քանի որ շատ պարզ է ձեռագիրը՝ ստեղծել իբրև թե հայկական կողմի նախահարձակ լինելու տեղեկատվական պատրանք, և այդ կերպ արդարացնել այն սադրանքները, որ պլանավորում է Բաքուն:
ԵՄ դիտորդական առաքելությունը փաստորեն հերքում է թե՛ հայկական, թե՛ նաև ադրբեջանական կողմում անսովոր շարժերը:
Այստեղ, իհարկե, պետք է հասկանալ, թե ԵՄ-ն ի՞նչ մանրակրկիտությամբ է դիտարկում ադրբեջանական կողմը: Առաքելությունը գործում է Հայաստանի տարածքում, ունի դիվանագիտական առաքելության կարգավիճակ, դրանով ստացել է նաև տեղեկատվության գաղտնիություն և հայկական կողմի համար անհասանելի են ԵՄ դիտորդների տնօրինած տեղեկությունները, գրագրությունը և այլն:
Անխոս է, որ Հայաստանի տարածքում գործունեության հանգամանքը ԵՄ դիտորդներին թույլ է տալիս շատ ավելի հանգամանալից տիրապետել իրավիճակին, այն իրավիճակին, որ կա հայկական կողմում:
Այլ կերպ ասած, Հայաստանի տարածքում տեղի ունեցողը նրանք դիտարկում են, պատկերավոր ասած՝ ոչ թե հեռադիտակով, այլ անզեն աչքով: Այլ է Ադրբեջանի պարագան, հետեւաբար հարց է, թե արդյո՞ք ԵՄ դիտորդների տեղեկությունը, որ իրենք ադրբեջանական կողմում չեն արձանագրել անսովոր շարժ, իրապես արտացոլում է այն, ինչ կա ադրբեջանական կողմում:
Այստեղ խնդիրը այն է, որ ԵՄ դիտորդների տեղեկությունը, հայտարարությունը, այսպես ասած «մաքրում» է Ադրբեջանին, ստեղծում է հայելային պատկեր:
Մինչդեռ մեղմ ասած դառը փորձը ցույց է տվել, որ այդ առումով հայելային պատկեր Հայաստանի ու Ադրբեջանի միջև չի եղել երբեք: Հետևաբար, աչք ծակող ռազմատենչությամբ ու ագրեսիայով գործող Ադրբեջանին «մաքրող» հայտարարություն անելու դեպքում թերևս պետք է ունենալ հավասարապես նույնքան դիտարկման հնարավորություն, գործելու նույնքան ազատություն և տարածություն, որքան ունեն Հայաստանում:
Իսկ այդպիսի «հավասարություն»՝ գործելու պայմանների հավասարություն ԵՄ դիտորդները չունեն, հետևաբար, թերևս, առավել նախընտրելի կլինի, եթե նրանք չանեն իրավիճակի «հավասար» գնահատում ենթադրող հայտարարություններ:
Բաց մի թողեք
Ակամա Վրաստանը դիտարկելը Հայաստանի խոչընդոտ՝ խնդիր է
Ասադից հետո Ռուսաստան, Իրան, Թուրքիա եռյակի միջև բաժանարար գծերը կարող են խորանալ, ինչ սպասել
Ասադը կործանվեց, ինչ է սպասվում մեր տարածաշրջանին, հիմա բոլորը ողջունում են հակակառավարական ուժերին