Նիկոլ Փաշինյանը հայտարարել է նոր Սահմանադրության հանրաքվե անցկացնելու անհրաժեշտության մասին՝ դա պայմանավորելով «իրական Հայաստանի» այսպես ասած գաղափարախոսությամբ:
Իրականում, սակայն, չափազանց պարզ է, որ Փաշինյանի այդ քայլը պայմանավորված է Ադրբեջանի հայտնի պահանջով: Բաքուն պարբերաբար հայտարարում է, որ քանի դեռ չի եղել Սահմանադրության փոփոխություն, չի լինի խաղաղության պայմանագրի ստորագրում:
«Պատճառաբանությունը» կապն է Անկախության հռչակագրի հետ և հռչակագրում Արցախի հիշատակումը: Իհարկե, միամիտ է մտածել, թե Սահմանադրություն անելուց հետո Բաքուն ստորագրելու է պայմանագիրը: Ի վերջո, Ադրբեջանը ներկայացնում է մի քանի պայման, իսկ լայն իմաստով, պայմանագիր ստորագրելը կախված է լինելու ռեգիոնալ իրավիճակից և մակրո ու միկրո մակարդակում ուժերի բալանսից:
Նիկոլ Փաշինյանը, անկասկած, շատ լավ է դա պատկերացնում: Այդ դեպքում հարց կառաջանա, թե ինչո՞ւ է հայտարարում Բաքվի պահանջը կատարելու մասին, թեև այլ փաթեթավորումով: Արդյո՞ք Նիկոլ Փաշինյանը զգում է որևէ վտանգ և փորձում է իր այդ հայտարարությամբ չեզոքացնել կամ զսպել այդ վտանգը:
Իհարկե, պետք չէ բացառել, բայց այդ դեպքում կառաջանա հարց՝ դա բավարա՞ր է, թե՞ Ադրբեջանն այս անգամ էլ կպահանջի կոնկրետ ժամկետներ և որքան հնարավոր է արագ: Նիկոլ Փաշինյանը չի խոսել ժամկետների մասին:
Նա ծրագրում է հանրաքվե անել 2026 թվականին սպասվող խորհրդարանի հերթական ընտրությանը զուգահե՞ռ, մինչև այդ ընտրությունը, թե՞ Սահմանադրության հանրաքվեի նախաձեռնությունը դարձնել նաև արտահերթ ընտրության առիթ: Կոնֆիգուրացիաները կարող են լինել տարբեր՝ կախված թե՛ ռեգիոնում իրավիճակից, միջազգային միջավայրից և թե՛ գուցե Ադրբեջանի վարքագծից:
Եթե Նիկոլ Փաշինյանը բարձրաձայնում է նոր Սահմանադրության մասին, ապա տրամաբանությունը հուշում է, որ այդ օրակարգը պետք է ենթադրի նաև այն մանդատի վերանայում, որ Փաշինյանը ստացել է այսպես ասած հին «գաղափարախոսության» շրջանակում:
Հետևաբար, նոր Սահմանադրության հարցը հանրաքվեի դնելը պետք է առնվազն լինի մանդատը դնելուն զուգահեռ: Այսինքն՝ հանրաքվեն պետք է լինի կամ խորհրդարանի ընտրությանը զուգահեռ, կամ՝ դրանից հետո, որպես ընտրության առանցքային ծրագրային դրույթ:
Հնարավոր է, իհարկե, որ Նիկոլ Փաշինյանը պարզապես փորձում է մանևրել, ժամանակ շահել: Այդ պարագայում, սակայն, հարց կառաջանա, թե դա նշանակո՞ւմ է արդյոք, որ կա էսկալացիայի վտանգ:
Համենայն դեպս, հենց այսօր հրապարակվել էր ԵՄ դիտորդական առաքելության ղեկավարի հարցազրույցը հայկական պետական գործակալությանը, որտեղ նա ասում էր, որ սահմանին հանգիստ է, չի նկատվում լարվածություն:
Միաժամանակ նա ասել էր, որ այդ հանգստությունը նաև իրենց ներկայության արդյունք է: Եթե դա այդպես է, ապա Նիկոլ Փաշինյանն ինչո՞ւ պետք է ընդառաջ գնա Ադրբեջանի պահանջին՝ այն էլ անհամաչափ և անհիմն պահանջին, Հայաստանի ներքին գործերին միջամտություն ենթադրող պահանջին և հայտարարի նոր Սահմանադրություն ընդունելու մասին, թեկուզ «գաղափարաբանական» պատճառահետևանքային փաթեթավորումով:
Բաց մի թողեք
Երևանը կոլապսի մեջ է, իշխանությունը պարալիզացվել է, ավտոբուսները կանգնած են․ Տեսանյութեր
Փաշինյանի վարկանիշային կորուստն ու մրցակիցներինը ինչ դրսևորում կունենան նոր Սահմանադրության հանրաքվեի հետ
ԵՄ առաքելությունը հավատարիմ կմնա տարածաշրջանում խաղաղությանն ու կայունությանը. նոր մանդատը ուժի մեջ է մտել