Գերմանիայի նոր կանցլերը՝ ԱՄՆ-ից «իրական անկախացման» ու Թուրքիայի մասին

Գերմանիայում փետրվարի 23-ին կայացած արտահերթ խորհրդարանական ընտրություններում հաղթած Պահպանողական կուսակցությունների դաշինքի ղեկավար Ֆրիդրիխ Մերցը որպես առաջնահերթություն նշել է ԱՄՆ-ից «իրական անկախացումը», մասնավորապես, անվտանգության հարցերում, հաղորդում է Reuters-ը։

Ֆրիդրիխ Մերցը նաև կասկածներ է հայտնել Երկրորդ համաշխարհային պատերազմից ի վեր Արևմուտքի պաշտպանական շահերն աջակցող ՆԱՏՕ-ի ապագայի վերաբերյալ։

Քննադատելով Թրամփին՝ Գերմանիայի ապագա կանցլերն ասել է, որ նրա վարչակազմը ցույց է տվել, որ «մեծապես անտարբեր է Եվրոպայի ճակատագրի նկատմամբ»:

«Իմ բացարձակ առաջնահերթությունը կլինի նպաստելու Եվրոպայի հնարավորինս արագ հզորացմանը, որպեսզի մենք քայլ առ քայլ կարողանանք հասնել ԱՄՆ-ից իրական անկախության»,- հավելել է նա։

ի դեպ, չնայած Մերցի քննադատություններին՝ Թրամփը ողջունել է ընտրությունների արդյունքները: «Ինչպես Միացյալ Նահանգները, Գերմանիայի ժողովուրդը ևս հոգնել է էներգետիկայի և ներգաղթի վերաբերյալ տարիներ շարունակ առկա անմիտ օրակարգից», – գրել է Թրամփը Truth Social-ում:

Միաժամանակ, իշխանամետ «Türkiye» թերթը նշում է, որ ընտրություններում հաղթած Ֆրիդրիխ Մերցը հայտնի է Եվրամիությանը Թուրքիայի անդամակցության հարցում դեմ դիրքորոշմամբ։ Իր նախընտրական ծրագրում արված հայտարարություններում Մերցն ընդգծել էր․ «Թուրքիան կարևոր գործընկեր է, որը պահպանում է իր ռազմավարական նշանակությունը Եվրոպայի համար։ Սակայն ստեղծված իրավիճակում այն հեռացել է ԵՄ արժեհամակարգից, ուստի հնարավոր չէ, որ դառնա միության անդամ»։

Միաժամանակ նա հայտարարում է՝ «Թուրքիան Գերմանիայի համար կարևոր գործընկեր է և՛ տնտեսական, և՛ քաղաքական առումով։ Որպես ՆԱՏՕ-ի անդամ՝ Թուրքիան մեծ դեր է խաղում տարածաշրջանային անվտանգության մեջ։ Սակայն առայժմ ոչ Եվրոպան, ոչ էլ Թուրքիան իսկապես չեն ցանկանում Թուրքիայի անդամակցությունը ԵՄ-ին: Սա չի նշանակում, որ մենք չենք կարող համագործակցել: Ընդհակառակը, մենք պետք է ավելի ամրապնդենք մեր հարաբերությունները»։

Ֆրիդրիխ Մերցը, ով պահպանողական դաշինքի՝ «Քրիստոնեա-դեմոկրատական/Քրիստոնեա-սոցիալական միության (CDU/CSU) առաջնորդն է, ելույթ է ունեցել էքզիթ փոլի հրապարակումից հետո։

Մերցը խոսել է քաղաքական հակառակորդների նկատմամբ հարգանքի մասին։

«Հիմա մենք միասին կխոսենք, եւ կարեւոր է, որ հնարավորինս շուտ կառավարություն ձեւավորվի։ Արտաքին աշխարհը մեզ չի սպասում: Աշխարհում բոլորը տեսնում են, որ Գերմանիան ունի վստահելի կառավարություն։ Այսօր մենք տոնելու ենք, իսկ վաղվանից կշարունակենք մեր աշխատանքը»,- ասել է Մերցը, ով ակնկալվում է, որ կդառնա Գերմանիայի կառավարության նոր ղեկավարը՝ փոխարինելով այժմյան կանցլեր Օլաֆ Շոլցին։

Նշենք, որ ըստ էքզիթ փոլի արդյունքների, Բունդեսթագի արտահերթ ընտրություններում Ֆրիդրիխ Մերցի պահպանողական «Քրիստոնեա-դեմոկրատական /Քրիստոնյա սոցիալական միություն» (CDU/CSU) պահպանողական դաշինքը առաջատար է Բունդեսթագի արտահերթ ընտրություններում 29 տոկոսով։ Երկրորդ տեղում Ալիս Վայդելի ծայրահեղ աջ «Այլընտրանք Գերմանիայի համար» (AfD) կուսակցությունն է՝ 19,5 տոկոսով, իսկ Օլաֆ Շոլցի ձախ կենտրոնամետ սոցիալ-դեմոկրատական ​​կուսակցությունը (SPD) ունի 16 տոկոս։

Գերմանիայի փոխկանցլեր Ռոբերտ Հաբեկի ձախ-ազատական ​​միությունը 90/Կանաչները հավաքում է 13,5 տոկոս: Ձախ կուսակցությունը հավաքում է 8,9 տոկոս, ձախ պոպուլիստական ​​Սառա Վագենկնեխտ միությունը (BSW) հավաքում է 4,7 տոկոս, իսկ լիբերալ Ազատ դեմոկրատական ​​կուսակցությունը (FDP)՝ 4,9 տոկոս։