Վիրտուոզ դաշնակահար Հայկ Մելիքյանի մենահամերգն էր Յոհան Սեբաստիան Բախ ծրագրով ու Bach+Forth ձայնասկավառակի շնորհանդեսը։ Հրաշալի ծրագիր էին կազմել’ բարոկկո շրջանի ու ժամանակակից դասական երաժշտության, կոմպոզիտորների համադրությամբ։ Պարզապես հրաշք, իսկական մեդիտացիա…
Այսքան ֆեյսբուքյան գրառումս է՝ առաջին բոց տպավորությանս արձագանքը։ Հիմա՝ ամեն բան հերթով ․․․ Համերգին ներկա էին ՀՀ-ում հավատարմագրված դեսպաններ, հյուրեր։
Ի սկզբանե, Կոմիտասի անվան Կամերային երաժշտության տան կիսամութ դահլիճ էր, միայն ռոյալի հատվածը լուսավորված, խորհրդավորություն էր ներշնչում ու հոգևորի սպասում, ինչը չուշացավ ․․․
Հայկ Մելիքյանի պրոդյուսեր Ալեքսանդր Պլատո Հակոբյանը նախաբան՝ ինֆորմացիոն ու գեղարվեստական խոսք ասաց․ Բախի հռչակն է ստիպել միջազգային հեղինակավոր ձայնագրման ստուդիային՝ դաշնակահար Հայկ Մելիքյանին պատվիրակել ձայնագրության համար կատարումներ Բախի խորհալային պրելյուդների, նրա երաժշտության դաշնամուրային փոխադրումների սկավառակը՝ Bach+Forth խորագրով։ Այն հրապարակվել է անցած տարվա վերջին՝ ինչպես կոշտ ձայնասկավառակով, ինչը նաև նվեր ստացա՝ հոգաչափ շնորհակալ եմ, այնպես էլ միջազգային տասնյակ էլեկտրոնային հարթակներում, որտեղ Հայկ Մելիքյանի մատուցմամբ Բախի երաժշտությունը առաջին հորիզոնականում է։
Ինչպես ներկայացրեց Ալեքսանդրը` մեր Ալեքսը, Հայկ Մելիքյանը պատրաստել էր մի ծրագիր, որտեղ համադրված էին բարոկկո շրջանի գլուխգործոցներն ու 20-րդ դարի ու մերօրյա կոմպոզիտորների ստեղծագործությունները։
Հատուկ այս համերգին մասնակցելու համար, որովհետև կատարվեց նաև իր ստեղծագործության պրեմիերան, Կիպրոսից Երևան էր ժամանել ժամանակակից կոմպոզիտոր Անդրեաս Ցիարթասը։ Ծրագրում ընդգրկված էր և բնականաբար կատարվեց նաև մեր հայրենակցուհի ու ևս ժամանակակից կոմպոզիտոր Թեհմինե Սչիֆֆերի գործը, ով ապրում և ստեղծագործում է Վիեննայում։ Իսկ բարոկկո գործերի շարքում էր Ալեսսանդրո Սքարլաթթիի Տիգրան օպերայի մի արեայից Հայկ Մելիքյանի կողմից դաշնամուրային փոխադրում կատարված ստեղծագործությունը։
Համերգն, ինչպես նախապես այն բնորոշեց նաև Հայկ Մելիքյանի պրոդյուսերը, հոգևոր ծիսակարգ էր, մարդկային հանճարեղության կուլմինացիա, բարոկկո ժամանակաշրջանից անմիջապես հետո անցումը մեր օրեր պարզապես գեղագիտական մոտեցում չէ, իրենք՝ համերգի կազմակերպիչների ցանկությունն էր դրականով հանգստացնել մեր անդադար ելևէջող մտքին, որպեսզի ժամանակակից կոմպոզիտորների, այդ թվում նաև Հայկ Մելիքյանի՝ որպես կոմպոզիտոր ասելիքը թևակոխի մեր հոգիներ։
Մեր միտքն էլ առավելապես հանգստացավ, տրվեց նրան այդ առավելությունը։ Իսկ դրա համար ոչինչ չէր խնայվել, ավելին՝ ապահովվել էր տեսողական, գեղագիտական միջավայր, ինչը մասամբ մեր ընթերցողը կարող է վայելել լուսանկարներից։
Ճիշտ հնչյուն, ճիշտ խոսք, ճիշտ մատուցում և իհարկե՝ ճիշտ հոգեվիճակ։ Իսկապես մի իսկական վայելք, ճախրանք տիեզերական անվերջությունում ու դաշնամուրային հոգեթով հնչյունների վիրտուոզ կատարում Հայկ Մելիքյանի կողմից, ով ամեն անգամ իր մենահամերգներով լույս, հույս ու տիեզերական հանգստություն է փոխանցում իր երկրպագուների հոգիներին։
Սիմոն Սարգսյան
Բաց մի թողեք
Հայ ժամանակակից արվեստի հաղթանակը միջազգային բեմում. Ռիմա Պիպոյանի և Սերգեյ Ումրոյանի «Իկոնա» բալետի համաշխարհային պրեմիերան
Հայաստանում կանցկացվեն Վրաստանի մշակույթի օրեր
Հայաստանը մասնակցել է Ժնևի Գրքի միջազգային ցուցահանդեսին. Լուսանկարներ