Հանրության հետ կապերի ամերիկա–իսրայելական կոմիտեի (AIPAC) գլխավոր գործադիր տնօրեն Էլիոթ Բրանդտը հայտարարել է, որ «ազդեցություն ունի» ԱՄՆ անվտանգության ոլորտի բարձրաստիճան պաշտոնյաների նկատմամբ:
Նա նշել է Կենտրոնական հետախուզական վարչության տնօրեն Ջոն Ռետկլիֆի և պետական քարտուղար Մարկո Ռուբիոյի անունները, որոնք «պաշտպանում են Իսրայելի շահերը»:
Այդ մասին գրում է Թուրքիայի «Անադոլու» պետական լրատվական գործակալությունը՝ հղում անելով ամերիկյան The Grayzone անկախ պարբերականին, որի տրամադրության տակ է հայտնվել այս տարվա AIPAC –ի առաջին դռնփակ նիստում Բրանդտի զեկույցի ձայնագրությունը: ԱՄՆ-ում հրեական լոբբիի գլխավոր դեմքը, ըստ այդմ, բացահայտում է, որ նշված գործիչների հետ աշխատել սկսել են դեռևս Կոնգրեսից, ինչի շնորհից տիրապետում են գաղտնի տեղեկությունների:
Հրեական լոբբիի կողմից «հավաքագրվածների» շարքում նա նշել է նաև ԱՄՆ նախագահի ազգային անվտանգության հարցերով գլխավոր խորհրդական Ուոլցին:
Նա հայտարարել է, որ Կոնգրեսում լոբբիստական գործունեության շնորհիվ կարորղ է ԱՄՆ անվտանգության և արտաքին քաղաքականության բնագավառներում պաշտոնի հասցնել իսրայելամետ գործիչների, որոնց նախընտրական քարոզչությունը հենվել է իսրայելական դոնորների հատկացումներին: Պարզ ասած, հրեական շրջանակները ֆինանսավորել են նրանց քաղաքական գործունեությունը:
Ամենակարևորը, թերևս, այն է, որ Բրանդտը հավաստիացրել է, որ կատարված և շարունակվող լոբբիստական գործոնեության շնորհիվ Սպիտակ տունն Իսրայելին վերաբերող հարցերում «Կոնգրեսի նկատմամբ ստիպված կլինի զգայուն վերաբերմունք ունենալ»:
Տեղեկատվական նման արտահոսքերը երբեք պատահական չեն կազմակերպվում: Իսրայելական մամուլն անհանգստություն է հայտնում, որ Դոնալդ Թրամփը՝ զգուշանալով լայնածավալ պատերազմի սպառնալիքից, կարող է Իրանի հետ կնքել գործարք, որ հրեական պետության համար սպառնալիք կներկայացնի:
Ըստ տեղեկությունների՝, ԿՀՎ տնօրեն Ռետկլիֆը գործուղվել է Երուսաղեմ, որպեսզի Նաթանյահուին ներկայացնի Իրանի միջուկային ծրագրի հարցում Սպիտակ տան դիրքորոշումը:
Միացյալ Նահանգների նախագահի հատուկ ներկայացուցիչ Ուիթկոֆը լրագրողներին պարզաբանել է, որ Դոնալդ Թրամփից մի հանձնարարական ունի՝ հասնել Իրանի միջուկային ծրագրի «ապամոնտաժմանը, որպեսզի Թեհրանը երբեք միջուկային զենք չունենա»: Ըստ որոշ տեղեկությունների՝ ԱՄՆ-ն Իրանին առաջարկել է «ունեցած ուրանի բոլոր պաշարները փոխանցել Ռուսաստանին»:
Ի՞նչ ընթացք կունենան իրանա-ամերիկյան բանակցությունները, որ արդեն իսկ ակնհայտորեն շաղկապվում են Ուկրաինայի հարցով ռուս-ամերիկյան «գործարքին»՝ ցույց կտա շաաբթավերջին կայանալիք՝ Ուիթկոֆ-Արաղչի երկրորդ հանդիպումը:
Ավելի կարևոր է, որ, ինչպես թուրքական «Անադոլուն» է փոխանցում, ԱՄՆ-ում իսրայելական լոբբիի գլխավոր դերակատար Բարնդտն ուշադրություն է հրավիրել «ակադեմիական շրջանակների հետ աշխատանքի կարևորության վրա»:
Նա ներկայացրել է հեռանկար, երբ հինգ տարի հետո այս կամ այն հարցում որոշում ընդունելու համար ԱՄՆ Կոնգրեսը կդիմի արհեստական բանականությանը, իսկ վերջինս հիմք կընդունի այն տեղեկատվությունը, որ առկա կլինի համացանցում: Բարնդտն այս դեպքում նկատի է ունեցել Իսրայելի մասին ակադեմիական տեղեկույթի ձևավորումը, բայց պարզ է, որ նման «դիագնոստիկան» վերաբերում է բոլոր երկրներին, միջազգային քաղաքականության կարևոր հարցերին:
Այս առումով ո՞րն է Միացյալ Նահանգներում կամ Ֆրանսիայում, կամ միջազգային կառույցներում հայկական լոբբիստական կազմակերպությունների խնդիրը: Հայաստանում և արտերկրում ի՞նչ որակի և ծավալի տեղեկույթ է ձևավորվում, որ վաղը կարող է արհեստական բանականության կողմից Հայաստանի վերաբերյալ քաղաքական որոշում ընդունելու խորհրդատվության հիմք հանդիսանալ: Այս և դրանից ածանցվող հարցերը քննարկվո՞ւմ են, լուծումներ ծրագրվո՞ւմ են:
Վերջին օրերին հայկական զայրույթի և դժգոհության հերթական պոռթկումը դրսևորվեց Վատիկանում Ադրբեջանի «քրիստոնեական ժառանգության» մասին գիտաժողովի առթիվ:
Բայց ի՞նչ է արել հայկական պատմագիտությունը, որպեսզի չեզոքացնի Ադրբեջանի նկրտումները, համացանցում այդ հարցի շուրջ հայկական տեսակետը հիմնավորող քանի՞ գիտական աշխատություն կա, որ հասանելի է նաև օտարալեզու գիտական շրջանակներին:
Իսրայելի՝ որպես կայացած ազգային պետության, օրինակը հեշտ է վկայակոչել, իսկ թե դրան հասնելու, այդ կարգավիճակը պահելու համար հրեական կազմակերպություններն աշխարհով մեկ ինչ քրտնաջան և համակարգված աշխատանք են տանում՝ այստեղ արդեն հայկական իրականությունը լռում է:
Բաց մի թողեք
Եթե «Հայաստան» դաշինքն առաջարկի Ռոբերտ Քոչարյանի թեկնածությունը, մենք կմիանանք. Հայկ Մամիջանյան
Փաշինյանի հրաժարականի՞, թե՞ ԼՂ ընտրված ներկայացուցիչների միջազգայնորեն ճանաչված մանդատի պահպանման հարց
Ադրբեջանի Միլլի Մեջլիսի պատգամավոր Բադամովը Մոսկվայի օդանավակայանում ձերբակալվել է. նա արտաքսվում է