Երեկ Կախվածությունների բուժման ազգային կենտրոնի տնօրեն Սուրեն Նազինյանը կենտրոնի ֆեյսբուքյան էջի միջոցով հրապարակավ հայտարարեց, որ օրերս հեռանալու է պաշտոնից:
Հրապարակ թերթը գրել է․ «Տեղեկացնում եմ, որ ս․թ․ ապրիլի 21-ին ՀՀ առողջապահության նախարարի կողմից ստացված գրության հիման վրա իմ՝ Կախվածությունների բուժման ազգային կենտրոնի տնօրեն Սուրեն Նազինյանիս, եւ ՀՀ առողջապահության նախարարության հետ 2020 թվականի մայիսի 4-ին կնքված պայմանագիրը լուծվում է 2025 թվականի մայիսի 4-ին։
Հարկ եմ համարում ընդգծել, որ տվյալ դեպքում ՀՀ առողջապահության նախարարության կողմից իրենց հայեցողության շրջանակներում չեն կիրառվել ՀՀ կառավարության 2022 թվականի փետրվարի 3-ի թիվ 129-Ն որոշման 85-րդ կետի 2-րդ ենթակետի կարգավորումները, այն է՝ պայմանագրով նախատեսված ժամկետը լրանալուց հետո այն կարող է երկարաձգվել կողմերի փոխադարձ համաձայնությամբ` ոչ ավելի, քան 3 տարի ժամկետով: Սույն դրույթի կիրառելիության արդիականությունը պայմանավորված է ոչ միայն ոլորտի (թմրաբանական բժշկական օգնության եւ սպասարկման) առանձնահատկությամբ եւ յուրահատկությամբ, այլ նաեւ իմ կողմից վարված պատշաճ եւ արդյունավետ կառավարման քաղաքականությամբ»,- գրել է նա, ապա թվարկել իր ղեկավարած հիմնարկի հաջողությունները:
Նախարարը կարող էր երկարաձգել Նազինյանի հետ պայմանագիրը առնվազն եւս երեք տարով, սակայն դա չի արել: Ինչո՞ւ, չէ՞ որ Նազինյանը համակարգում մասնագիտության մեջ ճանապարհ անցած պրոֆեսիոնալի համարում ունի, որպիսիք ալկոհոլիզմի եւ թմրամոլության ներկայիս աճի պայմաններում հատկապես անհրաժեշտ են պետությանը:
Զանգահարեցինք Սուրեն Նազինյանին: Զարմանալի է, որ Ձեզ հետ չեն վերակնքել պայմանագիրը, ինչո՞վ եք դա բացատրում: «Ինձ համար զարմանալի չէր: Ինձ համար պատճառներն ակնհայտ են, բայց դա առողջապահության նախարարության իրավունքն է»:
Դատելով Արսեն Թորոսյանին ուղղված շնորհակալությունից, որով տնօրենն առանձնացրել է նախկին ու ներկա նախարարներին, այս ազատման գաղափարի հեղինակն Անահիտ Ավանեսյանն է: Հարցրինք, թե ինչով է զբաղվելու, Սուրեն Նազինյանը պատասխանեց, որ որեւէ պետական հիմնարկից առաջարկ չի ստացել, սակայն իր մասնագիտությունը չի թողնելու:
Սուրեն Նազինյանը հանրապետությունում հայտնի թմրաբան է: Աշխատել է Նարկոլոգիական հանրապետական կենտրոնում, Առողջապահության ազգային ինստիտուտում՝ որպես թմրամիջոցների եւ կախվածությունների մոնիթորինգի կենտրոնի ղեկավար։ 2015 թվականի դեկտեմբերին աշխատել է ՀՀ ԱՆ քրեակատարողական ծառայությունում՝ ՀՀ ԱՆ քրեակատարողական ծառայության բժշկական սպասարկման բաժնի գլխավոր մասնագետ: 2016 թվականի մարտից մինչեւ 2019 թվականի ապրիլն աշխատել է ՀՀ արդարադատության նախարարության «Դատապարտյալների հիվանդանոց» քրեակատարողական հիմնարկում՝ որպես հիմնարկի նարկոլոգիական բաժանմունքի պետ։
Բաց մի թողեք
Կհաջողվի մեկ ամսվա ընթացքում վարչապետի պաշտոնն ազատել այն այսօր զբաղեցնողից
ՔՊ վարչության նիստում պաշտոն են բաժանել, ովքեր են թեկնածուները
Զեկույց, թե՞ մահակ