Մոսկվան վրեժ է լուծում. Շահրամանյանն է ԼՂ նախկին ղեկավարությանը հանձնել Բաքվին ու եկել ՀՀ. Շիրինյան

Վերջերս լրատվամիջոցներից մեկը, հղում անելով Լեռնային Ղարաբաղի ոմն նախկին պաշտոնյայի, որի անունը, սակայն, չէր հրապարակել, հայտնել էր, թե «Ադրբեջանում հայտնված մարդկանց ցուցակների համահեղինակը Նիկոլ Փաշինյանն է եղել, և իբրև թե Բաքվում հայտնվել են «հականիկոլականները» մի քանի բացառությամբ, իսկ մնացածը, որոնք «նիկոլական» են եղել, անվտանգ տեղափոխվել են Հայաստան»:

«Քրիստոնեա-ժողովրդական վերածնունդ» կուսակցության նախագահ Լևոն Շիրինյանը «Հայկական ժամանակ»-ի հետ զրույցում նկատում է՝ նրանց Մոսկվան է ուղարկել Բաքու, այսպես ասած, պատժել, թեև վերջիններս արել են այն, ինչ Կրեմլը թելադրել է, իսկ Հայաստանի իշխանություններին չեն էլ ենթարկվել:

Շիրինյանը նկատում է՝ Մոսկվան հույս ուներ, որ ղարաբաղյան կլանին մոբիլիզացնելով և Հայաստանի դեմ աշխատելով՝ կկարողանա Հայաստանի իշխանությանը տապալել, սակայն հայ հանրությունն ավելի խելացի գտնվեց, քան կարծում էին:

Իսկ ինչ վերաբերում է Բաքվում հայտնված հայ ռազմագերիներին, կուսակցության նախագահը նկատում է՝ Մոսկվան միշտ է այդպես վարվում իր հպատակների հետ՝ պատժում է, այս անգամ էլ Կրեմլը որոշեց իր «ստրուկներին» պատժել, ինչը նորություն չէ հայ-ռուսական հարաբերություններում:

Հարցին՝ ինչպես է Սամվել Շահրամանյանը անարգել կարողացել գալ Հայաստան, Շիրինյանն ասում է՝ պետք է գային և Մոսկվայի հաշվարկներով պետության մեջ պետություն ստեղծեին՝ Լեռնային Ղարաբաղի ինստիտուտները պահեին ու Հայաստանի դեմ աշխատեին, ինչը օրվա իշխանությունը թույլ չտվեց:

Զրուցակիցը նկատում է՝ Մոսկվան «իր աշխատողների» միջոցով ուզում է Հայաստանում անկայունությունը դարձնել բնական վիճակ և խանգարել պետության զարգացմանը:

Ըստ կուսակցության նախագահի՝ պետության և պետականության հիմքեր են ստեղծվում Հայաստանում, և այստեղ է, որ Կրեմլում թագավորը «մատը կծում» է, Շահրամանյաններին՝ հրահրում սադրելու:

Նրա խոսքով՝ մեր և մեր երկրի համար անվտանգության հարցը օրհասական է, և դեմոկրատական ընթացակարգերով պետք է երկիրը, ժողովրդին ու ժողովրդավարությունը պաշտպանել: