«Կարեն Բադալյանի հետ ունեցել ենք առանձնազրույց, նա ինձ ասել է, որ մանդատը վայր է դնում անձնական պատճառներից ելնելով, ու այս ամենը տեղի ունենալուց հետո, ես կարող եմ վերլուծություն անել՝ ՔՊ-ն չի հանգստացել, չի հանդարտվել, չի մարսել Գյումրիում եղածը և այս ամենը դրա հետևանքն է»:
ԱԺ-ում ճեպազրույցի ժամանակ այս մասին ասել է «Պատիվ ունեմ» խմբակցության պատգամավոր Մարտուն Գրիգորյանը: Նա նշել է, թե Կարեն Բադալյանի հետ լավ հարաբերություններ են եղել: «Նա մշտապես մեր աջակիցներից է եղել: Մինչև օրս նրա հետ ոչ մի կերպ կապ հաստատել չի ստացվել, չենք կարողանում հասկանալ՝ պատճառը որն է»,-ասել է Գրիգորյանը:
Մարտուն Գրիգորյանը կարծում է՝ «Քաղաքացիական պայմանագիր» խմբակցությունը հույս է ունեցել, որ անձնական խնդիրներից ելնելով՝ ինքը ձայն չէր տալու Վարդան Ղուկասյանին։
«Բոլորը մի մարդու պես պահանջում էին՝ Մարտու՛ն, տուր հնարավորություն, որ հավաքական ընդդիմության հաղթանակը չմսխեք, այդ հաղթանակը պետք է գա Երևան, մենք մեր քայլերն արեցինք, բայց հաղթանակի ալիքը դեռ Երևան չի եկել»,- լրագրողների հետ զրույցում ասել է Գրիգորյանը։
Նա հավելել է, որ անձնական հարցեր կան, բայց դրանք մնում են անձնական, այդ հարցերն առաջ չեն բերել, պետք չէ, քանի որ ըստ նրա՝ պետության ու պետականության խնդիր կա։
«Այս պահին առաջնորդվել անձնական հարցերով սխալ է»,- նշել է Գրիգորյանը:
Վերջինս գնահատական չի տվել, թե արդյո՞ք Ղուկասյանը լավ քաղաքապետ է. «Իմաստ չունի գնահատել. շուտ է: Բայց պետք է ասեմ՝ Գյումրիում Վարդան Ղուկասյանը միանձնյա քաղաքապետ չէ, Վարդան Ղուկասյանը երեք ուժերի աջակցությամբ է դարձել քաղաքապետ, որը պատասխանատու է թե՛ գյումրեցիների, թե՛ այդ ուժերի առաջ։ Կուզեմ ուղիղ ասել՝ սիրելի՛ գյումրեցիներ, բացարձակապես անհանգստանալու խնդիր չկա»։
Բաց մի թողեք
Ինչ փուլում է Մարտի 1-ի գործը
Կրակոցները նպատակ ունեն խաթարելու երկրի ներքին կայունությունն ու հանրային անդորրը․ Եղոյան
Տգիտության հերթական դրսեւորումն է՝ այդ մարդիկ իսկապես չեն հասկանում, թե ինչ է կատարվում աշխարհում