Միացյալ Նահանգների նախագահ Դոնալդ Թրամփը հայտարարում է, որ «բացարձակապես» մտածում է Ռուսաստանի դեմ նոր պատժամիջոցների մասին՝ ի պատասխան Մոսկվայի կողմից Ուկրաինայի վրա իրականացված զանգվածային հրթիռային ու անօդաչու հարվածների, որոնք սպանել են առնվազն 12 քաղաքացի և վիրավորել տասնյակ ուրիշների։
Թրամփը Պուտինին որակել է «բացարձակ խելագար»՝ շեշտելով, թե «նրան ինչ-որ բան է պատահել»։ Սա կտրուկ շեղում է նախկինում որդեգրած՝ հրադադարի վրա կենտրոնացած ռազմավարությունից։ Նրա հրապարակային հիասթափությունն ուղեկցվում է նկատելի փոփոխություններով՝ ԱՄՆ-ի արտաքին քաղաքական մոտեցումներում։
Միաժամանակ, ԱՄՆ Սենատում աճում է անհամբերությունն ու դժգոհությունը։ Սենատոր Լինդսի Գրեհեմի գլխավորությամբ հանրապետականները նախաձեռնում են օրենսդրական քայլեր՝ նոր պատժամիջոցներ սահմանելու Ռուսաստանի դեմ։ Նրանք մատնանշում են Պուտինի ռազմավարական համառությունը և ընդգծում՝ ժամանակն է Վաշինգտոնը կոշտ արձագանքի։
Եվրոպական երկրները արդեն պատժամիջոցներ են սահմանել Ռուսաստանի «ստվերային նավատորմի» և ֆինանսական հատվածի դեմ։ Թրամփի վարչակազմը, ըստ որոշ գնահատականների, պատրաստվում է առաջիկա օրերին ներկայացնել պատժամիջոցների փաթեթ, որը կարող է նույնիսկ գերազանցել Բայդենի օրոք սահմանված սահմանափակումները։
Ակնհայտ է՝ Վաշինգտոնում դիվանագիտության լեզուն աստիճանաբար փոխվում է։ Երբ Պուտինը մերժում է խաղաղ բանակցությունները, ԱՄՆ-ը վերադառնում է ուժի և ճնշման գործիքակազմին։
Թրամփ․ Պուտինը խելագարվել է, կործանում է Ռուսաստանը. Զելենսկին իր հայտարարություններով վնասում է Ուկրաինային. ԱՄՆ նախագահ Դոնալդ Թրամփը կտրուկ գնահատականներ է հնչեցրել ինչպես Վլադիմիր Պուտինի հասցեին, քննադատել՝ Զելենսկուն։
Truth Social-ում նա գրել է․ «Ես միշտ շատ լավ հարաբերություններ եմ ունեցել Պուտինի հետ, բայց նրա հետ ինչ-որ բան է պատահել։ Նա ամբողջությամբ խելագարվել է։ Առանց պատճառի սպանում է շատ մարդկանց՝ ոչ միայն զինվորների։ Հրթիռներ և անօդաչուներ են թռչում Ուկրաինայի քաղաքների վրա՝ առանց արդարացման։ Ես միշտ ասել եմ՝ նա ուզում է ամբողջ Ուկրաինան, և եթե այդպես է, ապա դա կդառնա Ռուսաստանի կործանումը»։
Թրամփը քննադատել է նաև Զելենսկուն՝ նշելով․ «Նրա խոսքերն ամեն անգամ խնդիր են առաջացնում։ Դա պետք է դադարի։ Զելենսկին այդ կերպ լավություն չի անում իր երկրին»։
Նա հավելել է, որ այս պատերազմը երբեք չէր սկսվի, եթե ինքը լիներ նախագահ։ «Սա Զելենսկու, Պուտինի և Բայդենի պատերազմն է, ոչ թե իմը։ Ես միայն փորձում եմ հանգցնել նրանց վառած մեծ ու տգեղ կրակները»։
Բաց մի թողեք
Պատերազմին վերջ չկա
Նախկին կանցլերն ընդդեմ գործողի
Նոր ուժգին երկրաշարժ Թուրքիայում, Էրդողանն արձագանքել է