«Մեծ յոթնյակի» երկրների առաջնորդները հունիսի 15-17-ը գագաթնաժողով են անցկացնում Կանադայի Կանանասկիս շրջանում:
Reuters-ը, հղում անելով իր աղբյուրներին, հայտնել է, որ G7-ի՝ Մեծ Բրիտանիայի, Գերմանիայի, Իտալիայի, Կանադայի, ԱՄՆ-ի, Ֆրանսիայի և Ճապոնիայի, առաջնորդները պատրաստել են Իրան-Իսրայել հակամարտության վերաբերյալ համատեղ հայտարարության նախագիծ, սակայն ԱՄՆ նախագահ Դոնալդ Թրամփը այն չի ստորագրել։
Գործակալության տվյալով՝ G7-ի առաջնորդներն այդ հայտարարության նախագծում կողմերին լիցքաթափման կոչ են արել, միաժամանակ նշել, որ Իսրայելն ինքնապաշտպանության իրավունք ունի։
Բացի այդ, պատրաստվել է համատեղ հայտարարության նախագիծ՝ կարևորագույն օգտակար հանածոների մատակարարումները պաշտպանելու և ազգային տնտեսություններին աջակցելու մասին։ Սակայն, ըստ Reuters-ի, Թրամփը հրաժարվել է ստորագրել նաև այդ փաստաթուղթը։
ԱՄՆ նախագահ Դոնալդ Թրամփը հայտարարել է, որ Իրանը չունի որևէ հնարավորություն ռազմական ճանապարհով հաղթելու Իսրայելին, ուստի կողմերը պետք է անցնեն բանակցությունների։ Այս մասին նա ասել է G7 գագաթնաժողովից առաջ Կանադայի վարչապետ Մայք Քարնիի հետ հանդիպման ժամանակ։
«Սա ցավոտ է երկու կողմերի համար։ Կասեի՝ Իրանը չի հաղթում այս պատերազմում։ Նրանք պետք է սկսեն բանակցություններ՝ և դա անեն անհապաղ», — ընդգծել է Սպիտակ տան ղեկավարը։
Թրամփը հավելել է, որ Թեհրանը հետաքրքրված է բանակցություններով, սակայն նման նախաձեռնությամբ պետք է հանդես գար ավելի վաղ։ Նա նշել է, որ արդեն անցել են այն 60 օրերը, որոնք Իրանին տրվել էին միջուկային համաձայնագիր կնքելու համար։ Նախագահը կոչ է արել Թեհրանին անհապաղ մտածել համաձայնագրի ստորագրման մասին, քանի դեռ ուշ չէ։
Լրագրողների հարցին՝ արդյոք ԱՄՆ-ը կմիանա հակամարտությանը, Թրամփը պատասխանել է . «Չեմ ցանկանում այդ մասին խոսել»։
Ավելի վաղ Իրանի ԱԳ փոխնախարար Աբբաս Արաքչին հայտարարել էր, որ Թեհրանը պատրաստ է ստորագրել համաձայնագիր, որը կսահմանափակի միջուկային զենքի ստեղծման հնարավորությունը, սակայն Իրանը ցանկանում է պահպանել խաղաղ ատոմային էներգիայի զարգացման իրավունքը։ Իրանի ղեկավարությունը նաև կոչ է արել ԱՄՆ-ին զսպել Իսրայելին, հակառակ դեպքում իրանական զինված ուժերը կդիմեն ավելի կոշտ պատասխան քայլերի։
Բաց մի թողեք
Պուտինի անսպասելի հայտարարությունը Ուկրաինայի հետ պատերազմն ավարտելու մասին
Անօդաչու թռչող սարքեր են հարձակվել Մոսկվայի մարզի վրա․ Լուսանկար
Կանե՛ս, Էմանուել․ ինչպես է Թրամփը ճնշել Մակրոնին