Մոսկվան Եկատերինբուրգի գործը «կջրի՞», թե՞ ստեղծվել է, որ Պուտինն Իլհամ Ալիևի հետ «գործարքի առարկա» ունենա

Ռուսաստանի Դաշնության կառավարության նախագահի տեղակալ Ալեքսեյ Օվերչուկի Բաքու այցը, որ ծրագրված էր հունիսի վերջին, չեղյալ է հայտարարվել: Այդ մասին հաղորդել է ադրբեջանական Trend գործակալությունը՝ հղում անելով սեփական աղբյուրներին:

Ըստ այդմ, Օվերչուկի այցի չեղարկման պատճառը հունիսի 27-ին ՌԴ Անվտանգության դաշնային ծառայության հատուկ նշանակության ջոկատի կողմից Եկատերինբուրգ քաղաքում իրականացրած գործողություններ են, որոնց հետևանքով «մի քանի ադրբեջանցի դաժանորեն սպանվել է»:

Ադրբեջանական գործակալության աղբյուրներն ընդգծել են, որ «ստեղծված իրավիճակում պաշտոնական Բաքուն Օվերչուկի և Ռուսաստանի Դաշնության ցանկացած պաշտոնական դեմքի Ադրբեջան այցը նպատակահարմար չի տեսնում»:

Ավելի վաղ ադրբեջանական լրատվամիջոցները հայտնել են, որ Բաքվում Ռուսաստանի գործերի ժամանակավոր հավատարմատարը հրավիրվել է ԱԳՆ, որտեղ նրան «ամենավճռական բողոքն է հայտնվել» Եկատերինբուրգում տեղի ունեցածի առթիվ: Ադրբեջանը պահանջել է բացահայտել և օրենքի ողջ խստությամբ պատժել մեղավորներին:

Միջադեպի կապակցությամբ ՌԴ Քննչական կոմիտեն հայտարարություն է տարածել, որտեղ ասվում է, որ Եկատերինբուրգում բերման են ենթարկվել նախկինում հանցագործությունների կատարման մեջ կասկածվող մի խումբ անձինք, որ էթնիկ հանցախմբի անդամ են:

Հղում անելով ՔԿ-ի հայտարարությանը, ՌԴ ԱԳՆ պաշտոնական ներկայացուցիչ Մարիա Զախարովան ասել է, որ ձեռք բերված փաստական նյութի մասին Մոսկվան իրազեկել է ադրբեջանցի գործընկերներին: Ռուսաստանի քաղաքական իշխանությունն, այսպիսով, որևէ կերպ չի կասկածել Քննչական կոմիտեի ներկայացրած պարզաբանմանը, լրացուցիչ ուսումնասիրություններ անցկացնելու մասին Բաքվին հավաստիացում չի արել:

Կարելի է վստահաբար ասել, որ Օվերչուկի Բաքու այցի չեղարկման գլխավոր պատճառն այն է, որ պաշտոնական Մոսկվան ևս ընդունել է, որ Եկատերինբուրգում ավելի քան քառորդ դար գործել է էթնիկ ադրբեջանցիների հանցախումբը, որի անդամները կասկածվում են վարձկանությամբ մարդասպանություններ իրականացնելու, մահափորձեր կազմակերպելու մեջ:

Ըստ որոշ տեղեկությունների, Եկատերինբուրգում ձերբակալվել է ավելի քան հիսուն ադրբեջանցի, մի քանի տասնյակ անձինք թաքնվում են, նրանց նկատմամբ հետախուզում է հայտարարվել:

Ի՞նչ առաքելությամբ էր Բաքու ժամանելու Ալեքսեյ Օվերչուկը: Քառասունչորսօրյա պատերազմից հետո նա զբաղվել է տարածաշրջանի կոմունիկացիաների գործարկման հարցերով, նրա մասնակցությամբ Հայաստանի և Ադրբեջանի փոխվարչապետների մի քանի աշխատանքային հանդիպում է կայացել:

Բայց Օվերչուկն ավելի շատ զբաղվել է Ադրբեջանի տարածքով Իրանի հետ երկաթուղային և ավտոմոբիլային հաղորդակցության հաստատման հարցերով:

Իրանում և նրա շուրջ նոր իրավիճակի հետ կապված՝ հնարավոր է, որ այդ ծրագրերի գործնականացման հարցում խնդիրներ են առաջացել: Ադրբեջանը չափազանց դժվարությամբ է համաձայնել Ռուսաստան-Իրան հաղորդակցության տրանզիտի ապահովմանը:

Իրանի դեմ իսրայելա-ամերիկյան պատերազմից հետո, երբ Իսրայելի վարչապետը և Միացյալ Նահանգների նախագահը խոսում են «բոլորովին նոր Մերձավոր Արևելքի» մասին, Բաքվին, բնականաբար, որոշակի ժամանակ է պետք, որպեսզի կողմնորոշվի: Պարզ չէ, մանավանդ, թե Ռուսաստանի հետ հաղորդակցությունն այսօր որքանո՞վ է շահեկան Իրանի համար:

Բաքուն, երևում է, նախապատրաստվում է Մոսկվայի հետ դիվանագիտական տևական «ճակատամարտի», որովհետեւ մերժում է ոչ միայն Օվերչուկին, այլեւ Ռուսաստանի ցանկացած այլ պաշտոնյայի այցը:

Մոսկվան Եկատերինբուրգի գործը «կջրի՞»: Իսկ գուցե այն բացվել է, որպեսզի Վլադիմիր Պուտինն Իլհամ Ալիևի հետ «գործարքի առարկա» ունենա՞, թե ռուս-ադրբեջանական հարաբերություններում իրոք «սառցե դարաշրջա՞ն է սկսվում»: