ՔՊ-ականները շարունակում են նոր բնակարաններ ձեռք բերել

Վերջին տարիներին, ինչպես ցույց են տալիս ուսումնասիրությունները, ՔՊ գրեթե բոլոր պատգամավորները բավականին մեծ ֆինանսական ձեռքբերումներ ունեն։

Մասնավորապես, 2024-ին իշխանական պատգամավորների զգալի մասը ձեռք են բերել անշարժ գույք, և այս ամենից անմասն չի մնացել նաև Սիսակ Գաբրիելյանը։

Նախկին լրագրողի հայտարարագիրը ուսումնասիրելով նկատում ենք, որ ՔՊ պատգամավոր դառնալուց հետո նա գրեթե ամեն տարի մի նոր իր կամ անշարժ գույք է ձեռք բերում։ Օրինակ՝ 2024-ին նոր բնակարան՝ 22 մլն 969 հազար դրամ արժողությամբ՝ Երևան քաղաքում։ Բացի այս, Գաբրիելյանը հայտարարագրել է նաև 2021 և 1987 թվականներին գնման եղանակով ձեռք բերված բնակարանները։

Հաշվետու տարվա վերջում նրա 3 անշարժ գույքը պահպանվել է։ Պատգամավորը անշարժ գույքի վերանորոգմանը տրամադրել է 3 մլն 5 հազար դրամ։

2023-ին Գաբրիելյանը գնել էր 2022 թվականի արտադրության ավտոմեքենա։

Հաշվետու տարվա սկզբին առկա փոխառության ընդհանուր վերցված գումարը կազմել է 22 մլն 999 հազար դրամ, իսկ տարվա ընթացքում վերադարձված փոխառության գումարի չափը նույնն է, ինչպես նաև 2 մլն 270 հազար դրամ հանձնված փոխառությունը վերադարձվել է։

Հաշվետու տարվա սկզբին Սիսակ Գաբրիելյանի բանկային հաշիվների մնացորդը կազմել է 598 հազար 975 դրամ, որը հաշվետու տարվա վերջին կրկնապատկվել է՝ դառնալով 1 մլն 306 հազար դրամ։

Նախկին լրագրող, այժմ ՔՊ-ական պատգամավորի կանխիկ դրամը հաշվետու տարվա վերջում 800 հազար դրամ է կազմել։

Նրա տարեկան եկամուտը կազմել է 16 մլն 755 հազար դրամ, որից 12 մլն 209 հազար դրամը աշխատավարձն է։ Իդեպ, ինչպես նկատեց MediaHub-ը, Սիսակ Գաբրիելյանի եկամուտը 2021 թվականի համեմատ աճել գրեթե 3 անգամ։

ՔՊ պատգամավոր Սիսակ Գաբրիելյանի վարկի մայր գումարի չափը հաշվետու տարվա դեկտեմբերի 31-ի դրությամբ կազմել է 23 մլն 945 հազար դրամ։