Ռուսաստանին և Ուկրաինային սպասվում է բարդ թեմաների քննարկում, այդ թվում կարգավորման վերաբերյալ կողմերի միջև փոխանակված հուշագրերը: Այս մասին լրագրողներին հուլիսի 22-ին ասել է Ռուսաստանի նախագահի մամուլի քարտուղար Դմիտրի Պեսկովը:
Նա միաժամանակ հույս է հայտնել, որ Ուկրաինայի հետ բանակցությունների հերթական փուլը կկայանա այս շաբաթ: Նրա խոսքերով՝ ժամկետների մասին կհայտարարվի հենց որ կոնկրետություն լինի: Ռուսաստանն այդ բանակցություններում «պաշտպանելու է իր շահերը»: Պեսկովի չի կիսել փորձագիտական շրջանակների հոռետեսությունը:
Նրա գնահատմամբ՝ ուկրաինական կարգավորման թեման այնքան բարդ է, որ զոհվածների մարմինների վերադարձի կամ փոխանակման հարցով պայմանավորվածություններն արդեն իսկ արդյունավետության նշան են:
Միաժամանակ, սակայն, Ռուսաստանի նախագահի մամուլի քարտուղարը խորհուրդ է տվել բանակցությունների հերթական փուլից «ճեղքման չսպասել»: Նա հավելել է, որ Ուկրաինայում ֆորմալ առումով պահպանվում է Ռուսաստանի հետ բանակցությունների արգելքը, որ սահմանված է նախագահ Զելենսկու հրամանագրով:
ՌԻԱ Նովոստիի դիվանագիտական աղբյուրն ակնարկել է, որ ռուս-ուկրաինական բանակցությունների երրորդ փուլը կարող է կայանալ հուլիսի 25-ին՝ Ստամբուլի Չիրաղան պալատում:
Անցյալ շաբաթավերջին Ուկրաինայի նախագահ Վլադիմիր Զելենսկին սոցիալական X հարթակում գրել է, որ Ազգային անվտանգության և պաշտպանության խորհրդի քարտուղար Ռուստեմ Ումերովն ռուսական կողմին առաջարկել է Ստամբուլում բանակցությունների նոր փուլ սկսել:
Առայժմ հայտնի չէ, թե ռուս-ուկրաինական բանակցությունները դարձյալ կանցկացվեն Թուրքիայի արտաքին գործերի նախարար Ֆիդանի միջնորդությա՞մբ, թե՞ կողմերը հասել են դեմ առ դեմ քննարկումներ անցկացնելու առաջընթացի:
Ռուս-ուկրաինական բանակցությունների նոր փուլի նախապատրաստումն ընթանում է Դոնբասում և Ուկրաինայի հարավ-արևելյան մարզերում Ռուսաստանի լայնածավալ հարձակման, Կիևի և այլ քաղաքների ամենաինտենսիվ հրթիռա-հրետակոծման ֆոնին:
Ռուսաստանի պաշտոնական դիրքորոշումն այն է, որ ինչքան բանակցությունները ձգձգվեն, այնքան Ուկրաինային «տարածքային հարցերում նոր խնդիրներ կունենա»:
Դիտարժան է, որ ռուս-ուկրաինական բանակցությունների նոր փուլ կազմակերպելու դիվանագիտական ջանքերին զուգահեռ «Ռամշտայնի ձևաչափով» կայացել է եվրոպական երկրների պաշտպանական գերատեսչությունների ղեկավարների հեռավար խորհրդաժողով, որի ընթացքում քննարկվել է Ուկրաինայի պաշտպանունակության ամրապնդման հարցը:
«Դիվանագիտական ճանապարհով Ռուսաստանի հետ համաձայնության ռեսուրսներն սպառված են»,- ավելի վաղ հայտարարել է Գերմանիայի կանցլեր Ֆրիդրիխ Մերցը: Գնահատականը, երևի, մոտ է իրականությանը:
Բայց Արևմուտքը որքանո՞վ է պատրաստ կամ ունակ, որպեսզի գետնի վրա իրավիճակում Ուկրաինային ապահովագրի Ռուսաստանի էքսպանսիոնիզմից:
Բաց մի թողեք
Սյունիքի «անցուղու» շուրջ վերջին քննարկումներին Թեհրանը մոտենում է առնվազն ընկալումով
Ի՞նչ են մտածում Վեհարանում, արդյո՞ք պատրաստ են Փաշինյանի «ազատագրմանը»
Հայ – թուրքական ոչ դյուրին հարաբերությունների մասին