Ոչ պաշտոնական այցով Շոտլանդիայում գտնվող ԱՄՆ նախագահ Դոնալդ Թրամփը հանդիպել է Մեծ Բրիտանիայի վարչապետ Քիր Սթարմերի հետ:
Բանակցությունների մեկնարկին նա լրագրողներին ասել է, որ մտադիր է կրճատել Ուկրաինայում հրադադարի հասնելու ժամկետները: Թրամփը կրկնել է, որ հիասթափված է Պուտինից:
Սթարմերի հետ բանակցություններից հետո Միացյալ Նահանգների նախագահը հայտարարել է, որ սահմանում է ռուս-ուկրաինական պատերազմում հրադադարի հաստատման նոր վերջնաժամկետ՝ «մոտ տասը-տասներկու օր՝ այսօրվանից սկսած»:
Այդ որոշումը Թրամփը հիմնավորել է նրանով, որ Ռուսաստանի նախագահի հետ մի քանի անգամ բանակցություններ է ունեցել, բայց հետո Պուտինը «հրթիռակոծել է ուկրաինական քաղաքները, օրինակ՝ Կիևը»: Ընդսմին, նա խոստովանել է, որ «սիրում է Ռուսաստանը» և չէր ցանկանա «նրան վատություն անել»:
Ակնարկն, ըստ երևույթին, պետք է հասկանալ այնպես, որ Թրամփը նշված ժամկետում հրադադարի հասնելու հույս ունի, այլապես հարկադրված կլինի Ռուսաստանի նկատմամբ պատժամիջոցներ կիրառել:
ԱՄՆ նախագահի այս հայտարարությունը հնչում է Ստամբուլում Թրամփ-Պուտին հանդիպում կազմակերպելու մասին Թուրքիայի արտաքին գործերի նախարար Ֆիդանի «բացահայտումից» հազիվ երկու օր հետո:
Այդ առթիվ, սակայն, ՌԴ մամուլի քարտուղար Պեսկովն ասել է, որ Ռուսաստանի և ԱՄՆ առաջնորդների հանդիպման կազմակերպումը ժամանակ և ջանքեր է պահանջում:
Դիտարժան է նաև, որ Պուտինից հիասթափության և Ուկրաինայի հետ հրադադարի հասնելու նոր ժամկետներ սահմանելու մասին ԱՄՆ նախագահը հայտարարել է Մեծ Բրիտանիայի վարչապետ Սթարմերի հետ բանակցություններից հետո:
Ռուսաստանի արտաքին գործերի նախարար Լավրովը վերջերս Մեծ Բրիտանիային բաց տեքստով քննադատել է 2022 թվականի ստամբուլյան պայմանավորվածությունները ձախողելու և Ուկրաինային պատերազմը շարունակելուն հարկադրելու մեջ:
Եվրոպական երկրներից Մեծ Բրիտանիան Ուկրաինային ռազմական աջակցության եռանդուն պաշտպաններից է: Վերջերս Լոնդոնը ռազմական համագործակցության պայմանագիր է ստորագրել նախ Ֆրանսիայի, ապա և Գերմանիայի հետ:
Եթե Թրամփի «վերջնագիրը» քարոզչական հնարք չէ, ապա, թերևս, կարելի է ասել, որ Ուկրաինայի, հետևաբար և Արևելյան Եվրոպայի ապագայի հարցում եվրոպական «եռյակին»՝ Մեծ Բրիտանիային, Ֆրանսիային և Գերմանիային, հաջողվել է ԱՄՆ նախագահին տարհամոզել, և նա Ռուսաստանին վերաբերվում է որպես Եվրոպայի անվտանգության սպառնալիքի:
Ի՞նչ կտա Թրամփի «վերջնագիրը», եթե այն, կրկնենք, լուրջ է: Վլադիմիր Պուտինը նահանջել չի կարող և, կարծես, չի էլ մտածում այդ մասին: Նրա նկատմամբ Եվրոպայի «հաղթանակը» կարող է վերածվել ավելի մեծ աղետի:
Բաց մի թողեք
«Անկանխատեսելի» Թրամփը մի օր էլ կարող է «ձեռքերը լվանալ» Հայաստան-Ադրբեջան կարգավորումից
Իսրայելի հետ միասին Ադրբեջանը Գազայի ժողովրդին սովի է մատնել
Ավելի քան 22 մլն դրամ՝ ՀՀ ֆինանսների նախարարի քրոջը․ ԲՏԱ նախարարության պայմանագրերի հետքերով