Նրա բոլոր քայլերը միտված են թշնամուն հանձնվելուն` կապիտուլացվելուն. Վարդանյան

«Կապիտուլիացիան ստորագրում են 1 անգամ, հնարավոր չէ 6 անգամ կապիտուլյացիա ստորագրել։ Եթե մենք լսենք մեր ընդդիմախոսներին՝ մենք 5-6 անգամ արդեն կապիտուլյացիա ենք ստորագրել, և դեռ քիչ է, պատրաստվում ենք նոր կապիտուլյացիաներ ստորագրել»։

Այս մասին այսօր հայտարարել է վարչապետ Նիկոլ Փաշինյանը:

«Սա արդեն բավարար վերլուծական բազա է արձանագրելու համար, որ ընդդիմության գործընկերները այդպես խոսում են՝ ասելիք չունենալու պատճառով, որևէ այլ պատճառ չկա»,-պնդել է նա:

ԱԺ «Հայաստան» խմբակցության պատգամավոր, դաշնակցական Քրիստինե Վարդանյանը «Հրապարակի» հետ զրույցում անդրադառնալով Փաշինյանի վերոնշյալ գնահատականներին, նկատում է. «Նրա այդ պնդումը բավականին տարօրինակ է, բայց իրականում Նիկոլ Փաշինյանին մեղադրում ենք շատ պարզ բանում: Պետք չէ հակասություններ փնտրել:

Նիկոլ Փաշինյանը ստորագրել է Արցախի կապիտուլյացիան և մեղադրվում է հենց դրանում, սակայն քանի որ մենք ունեինք երկու հայկական պետություն, հարցը սրանում է և հենց կապիտուլյացիների թիվը դրանով է բացառիկ:

Նա արդեն իսկ մեկ կապիուլյացիա ստորագրել է, երկրորդի մասով էլ անում է կոնկրետ քայլեր: Նրան մեղադրում էին և մեղադրում են Արցախի կապիտուլյացիայի համար և Հայաստանը նույն ճակատագրին արժանացնելու համար:

Բոլոր այն կանխատեսումները, այն պնդումները, որոնք այս տարիների ընթացքում արել են ընդդիմադիրները, անխտիր իրականացվել են: Անկախ այն բանից, թե դա որքանով կարող է տագնապ հարուցել, դա այլ հարց է: 2022 թվականի «Դիմադրության շարժումը» մի կարգախոս ուներ. «Ոչ Արցախի հայաթափմանը, ոչ Հայաստանի թրքացմանը»:

Այս կարգախոսի առաջին մասը տեղի է ունեցել, երկրորդը կանխելու համար պետք է անել քայլեր: Այն բոլոր գնահատականները, որ արվում են, այդ ամբողջի շրջանակներում են: Նիկոլ Փաշինյանը կարող է լինել մի քանի կապիտուլյացիայի հեղինակ, ինչու, պատասխանը շատ պարզ է, Հայաստանն ուներ երկու հայկական Հանրապետություն, որից մեկն է այժմ մնացել:

Նա կապիտուլյացիա իրականացնող քայլեր է իրականացնում: Փաշինյանը կոնկրետ իր գործողությունները մի քանի մասի է բաժանել և հերթով դրանք իրականացնում է: Կապիտուլյացիան մեծ հաշվով թշնամուն հանձնվելու քայլերն են, ինչը այժմ իրականացվում է Փաշինյանի թեթև ձեռքով: Այդ գնահատականներում չկա որևէ սխալ:

Նրա բոլոր քայլերը միտված են թշնամուն հանձնվելուն` կապիտուլացվելուն»: