Մտածեք, գլուխներդ պատին խփեք, ձեւը գտեք, որպեսզի այս տեսակ պրոբլեմներ չլինեն․ Սուրեն Աբրահամյան

Սեպտեմբերի 6-ին Հայաստանի ու Պորտուգալիայի հավաքականները մրցելու են Հայաստանում` 2026 թվականի աշխարհի առաջնության ընտրական մրցաշարում: Սակայն երբ օրեր առաջ խաղի տոմսերն առցանց վաճառքի հանվեցին, ֆուտբոլասերներն անակնկալի եկան, քանի որ նախ ֆեդերացիայի կայքը խափանվեց, հետո էլ՝ հերթագրման համակարգով ժամեր շարունակ հնարավոր չէր լինում տոմս գնել։

Հրապարակ թերթը գրել է․ Հետո հանկարծ, նույն օրը պարզվեց, որ 14 հազար հանդիսական տեղավորող Հանրապետական մարզադաշտի բոլոր տոմսերը սպառված են, իսկ իրականում Հայաստան-Պորտուգալիա հանդիպման տոմսերը հասել են սեւ շուկա ու վաճառքի հանվել աստղաբաշխական գներով` մեկ տոմսի համար մինչեւ 120 հազար դրամ:

Հայաստանի ֆուտբոլի ֆեդերացիայի նախկին նախագահ Սուրեն Աբրահամյանը, անդրադառնալով Հայաստան-Պորտուգալիա խաղի տոմսերի շուրջ ստեղծված աղմուկին եւ ֆեդերացիայի այն փաստարկին, որ համակարգը չի դիմացել հարցումների նման ծավալին, դրա համար էլ խափանվել է, կարճ նկատում է․ «Արմեն Նիկողոսյանին հարցրեք, թե ոնց են արել, որ խափանվել է․․․, 20 տարի ֆուտբոլում ինքն է»։

Ֆեդերացիաները չպե՞տք է ունենան մեխանիզմներ՝ նման խափանումները կանխելու եւ, առավել եւս, տոմսերը սեւ շուկա չթողնելու համար, որպեսզի տասնապատիկ ավել գներով դրանք հետո երկրպագուներին չվերավաճառվեն։ «Ամեն ժամանակ իր խնդիրներն ունի, եւ այսօր ֆուտբոլի հանդեպ հետաքրքրությունն աճել է, հատկապես՝ Պորտուգալիայի հետ խաղի պարագայում, որը Եվրոպայի լավագույն հավաքականներից է, եւ այստեղ Ռոնալդուի գործոնն է շատ մեծ դեր խաղացել երկրպագուներից շատերի համար»,- նշում է Աբրահամյանը:

«Այստեղ ուզում եմ նշել, որ ֆուտբոլ կլինի, տրանսպորտ, թե մետրո, ամեն ոլորտում ցանկացած գործընթացի համար ամենակարեւորը պարզությունն է։ Լինի դա հաճախորդ, ֆուտբոլասեր, թե ուղղակի քաղաքացի՝ ցանկացած գործընթաց պետք է լինի պարզ ու մատչելի, իսկ յուրաքանչյուր եվրոպական չափանիշների օնլայն տարբերակներն իրենց մեջ ռիսկեր են պարունակում, հատկապես որ դա անում են ոչ թե պրոֆեսիոնալները, այլ անում են թաքուն մի բան անող-փախցնողները։ Ամբողջ խնդիրը սա է։ Ինձ համար այնքան պարզ բացատրություններ ունեն որոշակի դրվագներ․․․ ես թքած ունեմ, թե Եվրոպայում կամ Ճապոնիայում ոնց են այս ամենը կազմակերպում, բայց մեզ մոտ պետք է հնարավորինս պարզ ձեւով կազմակերպվեր այս գործընթացը։ Այսօր ես մի հատ մետրոյի տոմս վերցնելու համար 10 րոպե հերթի մեջ կանգնեցի, 2 րոպե սպասեցի, որ ժամանակն անցնի, ու դա՝ այն դեպքում, որ իմ քարտի մեջ 3 տոմս կար, որի ժամկետներն անցել էին։ Ինչի՞ համար են այս բարդությունները՝ ինքներդ կռահեք․․․, նույնն էլ՝ ֆուտբոլում»,- ընդգծում է Ս. Աբրահամյանը։

«Վերջին հաշվով, կա՞ մեկը, որ պետք է պատասխան տա իրենց անհաջող՝ եվրոպական չափանիշների, օնլայն տարբերակների մեթոդների համար, որի ձեռքը մարդկանց գիժ են սարքում։ Այնպես որ, ինձ համար այդ կարգի իրենց բոլոր բացատրություններն անընդունելի են։ Մտածեք, գլուխներդ պատին խփեք, ձեւը գտեք, որպեսզի այս տեսակ պրոբլեմներ չլինեն։ Թե չէ՝ սարքն է խափանվել, թե կայքը՝ դա բացատրություն չէ, բա դուք ինչի՞ համար եք։ Եվ, մեծ հաշվով, պետք է պատասխան տրվի այդ հարյուր հազարավոր ֆուտբոլասերներին։ Ես այնպիսի մարդկանց գիտեմ, որոնք Հայաստանի հավաքականի մոլի երկրպագուներ են եւ չեն կարողացել տոմս ձեռք բերել այդ խաղի համար, իսկ այդ խելագար գները, որ դրել են տոմսերի վրա, ինչի՞ մասին է խոսքը․․․ եթե համակարգն է խնդիրը, թող մի անգամ էլ համակարգն այնպես խափանվի, որ ժողովրդին, ֆուտբոլասերներին ձրի տոմսերը տան, բա ինչի՞ չի լինում այդպես, թե՞ մենակ գներն են թռնում ու համակարգը խափանում։ Ինձ համար անընդունելի են այս վիճակը եւ այս տեսակ բացատրությունները։ Պարզ է, որ այս խաղի հանդեպ հետաքրքրությունը մեծ էր, բայց այնպես անեիք, որ համակարգը չխափանվեր, գիշերը հրացանը վերցնեիք՝ կանգնեիք, որ համակարգը չխափանվեր»,- եզրափակում է Աբրահամյանը։