Կա՞ մեկը, ով կասկածում է, որ Նիկոլ Փաշինյանը Իլհամ Ալիևի համար Հայաստանի ամենաձեռնտու ղեկավարն է

Եկեք միասին մի քանի պարզ հարց տանք ու միջին ինտելեկտի համար մատչելի վերլուծություն անենք` օգտվելով բաց աղբյուրներից…

Կա՞ մեկը, ով կասկածում է, որ Նիկոլ Փաշինյանը Իլհամ Ալիևի համար Հայաստանի ամենաձեռնտու ղեկավարն է, եթե չասենք` ուղղակի գտածո է: Կարծում եմ կասկածողներ դժվար թե գտնվեն: Գոնե վերջին 5 տարվա իրադարձություններն այդ պնդումը դարձրել են աքսիոմատիկ` ապացուցման ոչ ենթակա ճշմարտություն:

Կա՞ մեկը երկրագնդի վրա, որ չգիտի, թե այս 6 ամիսն ինչ ճակատագրական ամիսներ են Նիկոլ Փաշինյանի համար և նա ինչքա՜ն է ուզում վերընտրվել, որ շարունակի պաշտոնավարել որպես Հայաստանի վարչապետ: Այս 7-8 տարվա մեջ բոլորը պետք է համոզված լինեին, որ սա էլ վիճարկման ենթակա չէ:

Կա՞ մեկը, որ չգիտի` Հայաստանի անվտանգությունը, Ադրբեջանից բխող պոտենցիալ վտանգը, մեր սահմանների անխախտությունը, ադրբեջանցիների` հավանական միգրացիան Հայաստան…Փաշինյանի աքիլլեսյան գարշապարն է: Մեր ժողովուրդն անգամ քաղաքական հետապնդումներն ու ընտրական կեղծիքները կների, բայց դրսից եկող վտանգը, սահմանազատման անվան տակ նոր զիջումները, նոր կորուստները սրանց չի ների:

Հիմա պարզ հետևություն. եթե Ալիևը այս բարդ փուլում, երբ Նիկոլ Փաշինյանի հետագա պաշտոնավարման ճակատագիրն է որոշվում և ինքն էլ նրա մնալու գլխավոր (եթե ոչ միակ) շահառուն է, հարկ չի համարում զսպել իր խոսույթը, Սևանը Գյոյչա է կոչում, Հայաստանը` արհեստական պետություն, Զանգեզուրի միջանցքով է հպարտանում և խոստանում է գրավել մեր երկիրը (ոչ թե տանկերով, այլ մեքենաներով), այսինքն` ագրեսիվ լեքսիկոնից գոնե 6 ամիս չի հրաժարվում, դուք պատկերացնու՞մ եք ինչ է անելու և ասելու Փաշինյանի (Աստված մի արասցե) վերընտրությունից հետո:

Ալիևը հիմար չէ ու շատ լավ հասկանում է, թե իր ասածներն ինչ հետևանք կարող են ունենալ ՔՊ-ի համար: Եթե այսօր նա իրեն նեղություն չի տալիս մի քիչ չափավորել ախորժակը, պատկերացնու՞մ եք 26-ից հետո ինչերի է ընդունակ, եթե սրանք վերարտադրվեցին…

Արմինե Օհանյանի ֆեյսբուքյան էջից