Հայաստանում միայն ռուսերեն ուսուցմամբ քանի դպրոց կա, որքան աշակերտներ ունեն և որտեղ են դրանք

Հայաստանի 63 դպրոցում իրականացվում է ռուսերենի խորացված ուսուցում, որից 33-ը՝ Երևան քաղաքում, 30-ը՝ մարզերում:

Հայաստանի հանրակրթական ուսումնական հաստատություններում առարկան պարտադիր դասավանդվում է՝ սկսած 2-րդ դասարանից:

Այս մասին «Հայկական ժամանակ»-ի գրավոր հարցմանն ի պատասխան՝ հայտնել են Կրթական գերատեսչությունից:

Ըստ ԿԳՄՍՆ-ի՝ Երևանում՝ 19, իսկ մարզերում 18 պետական դպրոցների դասարաններ են ուսուցանվում ռուսերեն: Ոչ պետական դպրոցները մայրաքաղաքում երեքն են։ Մարզերում ռուսերեն ուսուցմամբ ոչ պետական դպրոցներ չկան։

Ընդհանուր առմամբ Երևանում առկա պետական և ոչ պետական դպրոցներում ռուսերեն ուսուցանվող աշակերտների թիվը 5 հազար 173 է, իսկ մարզերում՝ 1873:

Հայաստանում ամբողջությամբ ռուսական ծրագրով դասավանդվող ընդամենը մեկ պետական դպրոց կա, որտեղ աշակերտների թիվը 133 է: Այն Ֆիոլետովոյի միջնակարգ դպրոցն է: Սա պետական դպրոց է, սակայն գործում է մարզային ենթակայության ներքո: Համայնքը ռուսական է, և այնտեղ ապրում են մեծ մասամբ ազգությամբ ռուսներ:

Կա նաև մեկ ոչ պետական դպրոց ամբողջությամբ միայն ռուսերեն ուսուցմամբ, որտեղ աշակերտների թիվը 279 է: Այն Երևանի «Ռոսիա» հասարակական կազմակերպության «Սլավյանսկայա» միջնակարգ դպրոցն է:

Հայաստանում կա նաև երեք ռուսական դպրոց, որոնք ՀՀ-ի ենթակայության ներքո չեն․ դրանցից մեկը՝ Գյումրիում, մեկը՝ Քանաքեռում, իսկ մյուսը Արտաշատում է: Այս կրթական հաստատությունները ՌԴ ՊՆ ենթակայության տակ են և սպասարկում են ՀՀ-ում տեղակայված ռուսաստանցի զինվորականների ընտանիքներին։

Ի՞նչ է ասում օրենքը Հայաստանում գործող օտարալեզու դպրոցների վերաբերյալ

ՀՀ-ում օտարալեզու դպրոցների հարցը կարգավորվում է 2009-ին ընդունված Հանրակրթության մասին օրենքով, ըստ որի՝ հանրապետությունում օտար լեզվով հանրակրթական հաստատությունների առավելագույն թիվը 11-ն է։ Դրանցից երկուսը կարող են ստեղծվել որպես ոչ պետական ուսումնական հաստատություններ Դիլիջանում և Ջերմուկում և կրթություն կազմակերպել 7-րդ դասարանից, իսկ ինը կարող են ստեղծվել նաև միջպետական համաձայնագրերի հիման վրա և իրականացնել միջնակարգ կրթության երրորդ աստիճանի հանրակրթական ծրագրեր, այսինքն՝ ավագ դպրոցում։

Միաժամանակ, նույն օտար լեզվով կրթական ծրագիր իրականացնող ուսումնական հաստատությունների առավելագույն թիվը չորսն է: Այսինքն՝ միաժամանակ կարող է լինել ռուսերենով ուսուցում իրականացնող առավելագույնը չորս դպրոց։