Բաքվում զինված միջադեպ է տեղի ունեցել․ սպանվել են ոստիկաններ և քաղաքացի

Բաքվում զինված միջադեպ է տեղի ունեցել, որի ժամանակ սպանվել են ոստիկաններ և քաղաքացի։

Այս մասին ասված է Ադրբեջանի ՆԳՆ-ի և Գլխավոր դատախազության համատեղ հայտարարության մեջ։

Հաղորդագրության համաձայն՝ 1986 թվականին ծնված Ռովշան Ալլահվերդիևը, որը հետախուզման մեջ է և մի քանի դատվածություն ունի, ձերբակալության ժամանակ զինված դիմադրություն է ցուցաբերել ոստիկանության աշխատակիցներին։

Ալլահվերդիևը, թաքնվելով ընտանիքի անդամների հետևում, կրակ է բացել Lancaster որսորդական հրացանից՝ սպանելով երեք ոստիկանի և մեկ քաղաքացիական անձի։

Ոստիկանության ձեռնարկած միջոցառումների ընթացքում Ալլահվերդիևը վնասազերծվել է։ Փաստի առթիվ հարուցվել է քրեական գործ, կատարվում է հետաքննություն, ասվում է համատեղ հայտարարության մեջ։