ԵՄ-ն բացառում է ՌԴ նախագահի հետ պաշտոնական շփումների հնարավորությունը. Բորել

Եվրամիությունը բացառում է պաշտոնական շփումները ՌԴ նախագահ Վլադիմիր Պուտինի հետ, հետևաբար ԵՄ խորհուրդը նախագահող Հունգարիայի վարչապետ Վիկտոր Օրբանն իրավունք չունի ներկայացնելու ԵՄ-ն Մոսկվա այցի ժամանակ։

Այս մասին ասված է ԵՄ դիվանագիտության ղեկավար Ժոզեպ Բորելի՝ Բրյուսելում տարածած հայտարարության մեջ։

«Օրբանը ոչ մի մանդատ չի ստացել ԵՄ Խորհրդից՝ այցելելու Մոսկվա: Վարչապետի այցը իրականացվում է բացառապես Ռուսաստանի Դաշնության և Հունգարիայի երկկողմ հարաբերությունների շրջանակներում»,- ասված է հայտարարության մեջ:

Բորելն ընդգծել է, որ ԵՄ Խորհրդի նախագահությունը Հունգարիային չի տալիս ԵՄ-ն միջազգային ասպարեզում ներկայացնելու հատուկ իրավունքներ, և որ այդ լիազորությունները բացառապես վերապահված են միայն իրեն և հեռացող ղեկավարին՝ ԵՄ խորհրդի նախագահ Շառլ Միշելին։