«Եթե ոչ հիմա, ապա ե՞րբ…». Նուբար Աֆեյանը ողջ հայությանը և ՀՀ ղեկավարությանը կոչ է արել հանդես գալ ի պաշտպանություն Ռուբեն Վարդանյանի. Լուսանկար

Ժամանակն է, որ Հայաստանի ղեկավարությունը բարձրացնի իր ձայնը ի պաշտպանություն Ռուբեն Վարդանյանի: Այս մասին հայտարարել է հայկական ծագումով հայտնի ամերիկացի միլիարդատեր Նուբար Աֆեյանը։

Փետրվարի 26-ին փաստաբան Ջարեդ Գենսերը հայտնել է, որ Լեռնային Ղարաբաղի նախկին պետնախարար, գործարար և բարերար Ռուբեն Վարդանյանի վիճակը կտրուկ վատացել է հացադուլից գրեթե մեկ շաբաթ անց։ Փաստաբանը դիմել է միջազգային հանրությանը՝ կոչ անելով շտապ միջոցներ ձեռնարկել Վարդանյանի իրավունքների պաշտպանության համար։

«Անտանելի է տեսնել ցավն ու անարդարությունը, որ իմ վաղեմի բարեկամ և գործընկեր Ռուբեն Վարդանյանին պատճառում է ադրբեջանական ռեժիմը։ Ժամանակն է, որ ողջ հայությունը, հատկապես Հայաստանի Հանրապետության ղեկավարությունը իրենց ձայնը բարձրացնեն։ Եթե ոչ մենք, ապա ո՞վ… Եթե ոչ հիմա, ապա ե՞րբ…»,- նշել է Աֆեյանը X սոցիալական ցանցում։

Նա նաև իր էջում կիսվել է Գենսերի հայտարարությամբ, որում կոչ է արվում Հայաստանի վարչապետին դատապարտել Բաքվում Վարդանյանի և մյուս հայ պատանդների դատավարությունը։